Parliament-ah Manipur chungchang sawi a tum a,
Forest Conservation Amendment Bill a thlawp lo bawk. Mizoram MP (Rajya Sabha) K Vanlalvena chuan NDA thlawptu ni mah se Manipur buaina chungchangah te, Forest Conservation Amendment Bill chungchangah te NDA thlawptu nihnain a phuar lo tih a sawi.
“NDA-a kan telnain min dal lo. A that leh that loh atangin kan teh a, kan ram leh hnam tan a tha em tih hi kan en chu a ni,” K Vena chuan a ti.
August ni 2 khan Rajya Sabha-ah Forest Conservation Amendment Bill hi an pass a, he Bill putluh hma hian K Vena chu a chhuak. Manipur buaina chungchang vangin an inau buai a, eptu member-te an chhuah hnuah he Bill hi an pass a ni. Eptu member ni lo K Vena pawh a chhuak.
Parliament monsoon session hi July ni 20-ah an tan a, Rajya Sabha leh Lok Sabha-ah ro an rel hlei thei lo. Manipur buaina chungchang vangin an inau buai a, rorel inkhawm an titawp ni tin a ni ber. K Vena hi Manipur buaina chungchang sawi tum pawlah a tel.
July ni 21 atangin Manipur buaina chungchanga adjournment motion putluh tumin dilna a thehlut thin a, tihhlawhtlin a la ni lo. Kar hmasa Ningani leh Zirtawpni khan a thehlut lo a, chawlhkar tharah thehluh leh a tum. Sawi an remti lo chungin a thuthmun atanga chhuakin sawi hi a dil lui tawh bawk.
“Keimah lo pawh, dil hi an awm a, 40 chuang te, 50 chuang te an ni a. Dil an awm tho alawm tiin ni hnih kha chu ka dil lo a, mahse dil leh ka tum,” a ti.
Amah ni lo mi dang zawng chu eptu pawl an ni a, K Vena hian ‘short discussion’ neih dilna a thehlut thin bawk. Hetah dilte hi chu NDA lam an ni a, hei hi a dil tawh lo. “An sawi tum dan leh ka sawi tum a inang lo em a, ka dilna tur a ni lo a nih hi ka ti,” a ti.
NDA-a an tel chunga NDA thlawp lo zawnga a awm chungchangah K Vena chuan, “NDA kan thlawpna hian ram leh hnam tana theihtawp kan chhuahna kawngah min dal lo. Term hmasa lamah pawh kan MP thin Pu Zawma’n a thlawp lo tawh a, tunah pawh kei leh Pu Rosanga (Lok Sabha MP C Lalrosanga) te hi min dal lo,” a ti.
NDA lam atangin han ngaimawh emaw, ngaihtheih loh emaw a awm a hriat loh thu a sawi a, “An ngaimawh awm pawh ka hre lo a, han inkhak emaw han inzawh emaw pawh a awm chuang lo. Zalen takin kan awm mai,” a ti.
NDA-a kan telnain min dal lo: K Vena
