NDA atangin MNF chhuah ring lo
BJP telna sawrkarna ding dawn
BJP kaihhruai NDA atangin MNF an chhuah ngam a rinawm loh thu leh kumina Mizorama MLA inthlanpuiah BJP telna sawrkar a din ngei tur thu an party thupuangtu K Laldinthara chuan a sawi.
Aizawla thuthar thehdarhtute a kawmnaah kumin kumtawp inthlanpuiah BJP tel lo sawrkarna a awm dawn lo tih BJP Mizoram thupuangtu hian a sawi a. BJP chu party hrang hrangte rim rawn a ni, tiin, Congress party tih loh an thawhpui thei vek tih a sawi.
MNF party chu NDA-a tel, an MP-te pawh Parliament-ah NDA lama thu ni an ni a; centre lama BJP thawhpui siin, Mizoramah BJP haw ber anga langin, ‘lehkhama awr dum, lehlama awr sen’ dik tak an ni tih K Laldinthara hian a sawi a. Central minister lo kal apiangin, MNF minister thenkhat chuan state budget pawnlama an project neihte chu state BJP hruaitute kentirin, an recommend hial an la thin tih a sawi. Heng avangte hian BJP chu a lang apaua bei fo tawh lo turin thu an rawn tih a sawi a ni.
ZPM pawh NDA-a tela BJP thawhpui an hreh lo tih chu an hruaitute tawngkam leh tunhnaia Guwahati-a BJP hruaitu hmuh chungchang thu darh atang pawhin a chiang tih a sawi bawk.
Hlauh tur awm lo inhlauh siak inzirtir avanga BJP chirhtheh chu bansan ni thei se an duh tih BJP Mizoram thupuangtu hian a sawi bawk a. Election Commission of India leh BJP duhdan angin, sakhaw hmun thianghlima party mal emaw politic thila mimal beih ang chi chu tih tawh loh a nih theihna’n Mizoram People Forum hnenah an thlen tih a sawi a. CAB hlauh inzirtir a nih mek laia, he dan hman chuan Mizote leh Mizoram a nghawng tak thu tun thlenga hriat tur a awm lo ang bawkin, Uniform Civil Code pawh Mizote leh Mizoram tan emaw Kristian-te tinzawn awma siam leh duan a ni loa, hlauh tur a awm lo tih a sawi bawk.
Mizorama MNF sawrkar chu sawrkar laipui ruahmannaa miretheite leh loneitute dawmkanna tur ruahmanna hrang hrang thawk tha duh lo leh anmahni hmalakn anga lantir chingah K Laldinthara hian a puh bawk a. BJP leh Prime minister Modi chu mirethei leh kuthnathawktute tana ding, an hamthatna tur siamtu a ni tih a sawi a ni.
NDA atangin MNF chhuah ring lo BJP telna sawrkarna ding dawn
