Parliament Monsoon Session neih mekah Lok Sabha-a NDA sawrkar rintawk lohna motion putluhah Manipur buainaa sawrkar laipui rorel dan duh loin MNF member chuan sawrkar rin tawk lohna hi a thlawp dawn tih Information & Public Relations minister Lalruatkima chuan a sawi.
I&PR minister chuan Manipur buainaa Zohnahthlak unaute chunga harsatna rapthlak tak thleng chuan MNF sawrkar rilru a ti na takzet a, Zohnahthlak unauten an mamawhnaah an phatsan ngai dawn lo tih a sawi a. Lok Sabha-a Monsoon Session neihah pawh Manipur-a buaina thleng mek avanga sawrkar rintawk lohna (no-confidence motion) eptuten an putluh chu sawiho a nih thu leh hetah hian Mizoram sawrkar chuan dinna nghet leh ngaihdan mumal tak a neih avangin Mizoram MP pawh sawrkar rin tawk lohna sawihonaah hian tel ngei tura tih a nih thu a sawi.
“Manipur lama Zohnahthlakten harsatna an tawh hre chung leh an tawrhna hi a tawmpui tlat a, sawrkar laipui rorel dan hi tha a tih loh avangin, he sawrkar rin tawk lohna (no-confidence motion) hi MNF sawrkar chuan a thlawp dawn a, vote pawh sawrkar rintawk lohna lamah hian thlak ngei tum a ni,” a ti.
Tunhnaia Mizoram chhehvela Zofa unaute harsatna tawh chi hrang hrang chuan Zofa hnam hrang hrangte min tithangharh thar leh ta nia a lan thu pawh Lalruatkima hian sawiin, “Duh vang reng niloa thendarh tawk kan pipute hrehawmna leh tahna kha thangtharte hian kan thawidam a hun ta a, ram chuan ri nei mah se, hnam leh chhungkuain ri a nei ve thei lo. Chuvangin kan unaute tahna hi kan tahna a nih avangin an lamah kan tang tlat a, Mizorama chengte pawhin an tana innghah ngamna kan nih zel a ngai a, inpui an ngaih em em leh ngaihsak em emtu kan ni reng dawn a ni,” a ti.
NDA sawrkar ring tawk lo lamah Mizoram MP-in vote thlak dawn – Lalruatkima
