Cricket Association of Mizoram huaihawtin 2nd North East Cricket Development Committee (NECDC) Achiever’s Nite chu July 21 zan khan Aizawlah buatsaih a ni.
He hunah hian hmarchhak huamchhunga age category – Under 15, Under 16 leh Under 19 cricket player tha thlan chhuah mipa leh hmeichhia hnenah Best Batter, Best Bowler leh Best Wicket Keeper lawmman hlan a ni a. Men’s Under 25, Men Senior leh Senior Women huangah pawh sem niin Special Awards pahnih Emerging Player of the season leh Player of the season (Men’s Senior) sem a ni bawk. Lawmman dawngtute zingah hian Mizoram player pahnih – Johan Lalbiakkima, Ramhlun Venglai Cricket Club, Under 16 Boys Best Bowler Award dawngtu leh Thelma Laldinthari, Ainawn Veng, Under 19 Women’s Best Bowler dawngtute an tel.
Hmanpuitu chief minister Zoramthanga chuan kum tam tak hnuah cricket zara Northeast state hrang hrang inhmuhkhawm chu a ropuiin a hlu tih a sawi a. Mizote tan cricket chu infiamna tharlam tak a la nihna chen a awm rualin, tunhnaiah hmasawnna tam tak kan nei chhoa, Suaka Cricket Ground pawh changtlung takin kan nei ve ta tih a sawi. “Cricket infiamna hi India ramah a lian hle tih kan hre vek a, he infiamna ropui tak huangah hian North East state pawhin hma kan sawn ve zel a pawimawh a, hma sawn tura kan tanrual thiam a ngai. Keini’n hma kan sawn hian India kan timawi zual tihna a ni a, sang takah kan awm ve thei a ni tih hrereng ang u,” tiin kalkhawmte a sawm.
2nd NECDC Achiever’s Nite rual hian 8th NECDC Conclave neih nghal a ni a; Arunachal Pradesh, Sikkim, Manipur, Meghalaya leh Nagaland Cricket Association aiawhte an tel.
NE huap cricket hotute Aizawlah an inhmukhawm
