North Eastern Council secretary Satinder Kumar Bhalla chuan zan riakin Champhai a tlawh a. Ningani khan Champhai leh a chhehvela thlai leh thei sawngbawlna hmun bun tur leh a taka hman tawh ho a tlawh kual.
Mualkawi Ginger USP Main Processing Hub bunna tur project site leh Zotlang Ginger Spoke Hub tur tlawh a tlawh a. Hub-ah hian sawhthing tihfaina, grade siamna, a chan sawmna, pho rona leh pack-na tur khawl bun a ni dawn a. Project hi tan thuai a nih theihna turin chinfel ngai la awmte chak zawka peihfel dan tur department hotute thurawn a pe a, tualchhung sawhthing chingtute a kawm bawk.
NEC fund hmanga siam mek Passion Fruit Processing Unit tlawhin, thawktute a kawm a. Hawn a nih theihna tura hmabak la awmte zirchiang a, chak lehzuala hma la turin a hrilh. Sapthei tui quality tha siam chhuah a nih theihnan kawng engkima fimkhur tura chahin, Processing Unit enkawl tur leh thawktu mithiam zawn hmuh thuai tum turin a chah. Khawl bun piah lamah Processing Unit chu hawn a nih hnuah tha taka sapthei tui siam chhuak theia enkawl zui a pawimawh tih a sawi a ni.
Tlangsam-a Champhai Winery tlawhin, a enkawltu Champhai Grape Growers’ Society hotute nen an inkawm a. Zu zawrh lama sawrkar policy inthlak thin avangin grape huan siamtute chuan harsatna an tawh thin thu leh tunah chuan he winery kaltlang hian huan neitute dinhmun pawh a ziaawm phah thu hrilh a ni. Mizoram chu hmarchhak state zingah grape winery nei awmchhun kan ni tih lo hrilhin, he winery-ah hian ni khatah grape wine case 150 siam chhuah a ni a, ni khata siam theih tam ber case 600 siam chhuak theih dan tur a sawipui. Grape wine quality tha tak siam a, kuthnathawkte eizawnna tihchangtlun lehzual a nih theihnan tan la turin a chah a ni.
NEC secretary hian Sericulture department hnuaia Oak Tasar Seed Farm a tlawh bawk a. Department hotuten an hnathawh dan leh pangang atanga silk la zai siam chhuah a nih dan an hrilhfiah. Champhai chu Mizorama silk chi li – oak tasar, mulberry, muga leh eri siam chhuak thei awmchhun a nih thu hrilh a ni a. Pangang khawituten man tha zawka an la zai siam an hralh theih a ngaipawimawh tih a sawi. Hemi hnu hian Zokhawthar tlawhin, Land Custom Station hotute nen an inkawm.
Nilaini tlai khan NEC secretary hian NEC fund hmanga sak Zomi Cultural Centre-a hnathawh dan enfiahin, mipuiin tangkai taka an hman thuai theihnan hmabak la awmte chak zawka chinfel a tul tih a sawi a. He Centre hi Champhai mipui tana man chawia hawh theih tura ruahman a ni.
Hnahsin Kut hmanna hmunhma tlawhin Kut buatsaihtute nen an inkawm a, tun aia changtlung zawk leh ram chhung mai bakah rawn pawn mi tam zawk hip luh an nih theih dan tur a sawipui.
NEC hotu in Champhaia thlai leh thei sawngbawlna hmun a tlawh
