New Education Policy (NEP) 2020 kalpuina tura hmalak tawhna thlirho leh inrawnkhawmin Ningani khan Higher & Technical minister Dr R Lalthangliana hoin Aizawlah thutkhawm a ni a. H&TE hotute, college orincipal leh lecturer te, IQAC coordinator-te bakah H&TE Board member-te an tel.
Minister chuan a taka NEP 2020 kalpui turin thil pawimawh leh hriatchian tul a awm avangin kalphung thar hi zirna in hrang hranga thawkten an hriat bel a tul tih sawiin, “Khawvel changkang zelin thiamna sang zawk kentel tam tak a neih thu sawiin, thalaite ah thiamna satliah mai ni lo, thiamna tak tak leh a taka hman tangkai theih tur chi tuh a ngai tawh a, hemi kawnga tan lak a tul zia NEP 2020 hian a lantir a ni,” a ti.
NEP 2020 tihhlawhtlinna’na pawimawh tak, state university neih a tul thu leh hemi tur hian sawkarin ngun takin ngaihtuahna a seng a, cabinet meeting-a sawi ho a nih hnu ah, din a nih theihna’na a tul angte bawhzui tum a ni tih a sawi. State university din tumnaah hian a bika ngaihtuahtu tur team din a nih thu leh a tul dan anga inrawnkhawmna zau zawk pawh neih tum a nih thu a sawi bawk.
NEP 2020 kalpui tura inpuahchahna zingah, college tinin Institution Development Plan an thehlut tawh a; mandatory accreditation zawhfel vek tawh niin, refresher course leh training hrang hrang kalpui thin a ni. College pathumah post graduate multi displinary course kalpui niin, thawktu indaihlohna phuhrukna’n hma lak a ni. Skill enhancement course kalpui thuai tum a ni a, NEP 2020 awareness program vawi engemawzat neih a ni tawh a ni.
NEP 2020 atan H&TE inrawnkhawm
