Nikuma thalaite kaihhruainaa lungawi lohna lantira sorkar ding lai paih thlak hnua Nepal inthlanpuiah hmasa berah Rastriya Swatantra Party (RSP) chuan chiang takin hnehna an chang ta.
RSP hian bial 182 an la a, parliament rorelna in hniam zawka seat hmun thuma thena hmun hnih chu pahnihin an phak lo va. Heti chung chuan kum tam tak chhunga Nepal rama party pakhatin bial an lak tam ber tum a ni.
Nepali Congress chuan bial 38 lain pahnihna an ni a, Communist Party of Nepal UML (CPN-UML) chu bial 25 lain pathumna a ni a, vote nei thei mi maktaduai 19 vel zinga 60% velin vote an thlak a ni.
Inthlan result hian RSP hruaitu, rapper atanga politic-a zuang lut, Balendra Shah-a chu ram hruaitu tur ni turin kawng a hawnsak a. Sorkar thar siam tur erawh chuan chawlhkar khat vel a la ngai dawn nia sawi a ni.
Result hi RSP tan chuan thil mak a ni a, kum 2022-a din chauh a ni a, a din kuma inthlanpuiah palina an ni a. Shah-a hi tun hnaia a zawm chauh party ang bawka fiahna la hmachhawn lo a ni a, tun thlenga politic-a a tawnhriat awmchhun chu an khawpui, Kathmandu mayor a nih chauh a ni.
Inthlan result hian inthlan campaign laia lang tawh, inthlak danglamna duhna a lantira ngaih a ni a, party hrang hrangte chu Nepal-a thalai hna nei lo tam, sum leh paia harsatna leh inthlauhnate ngaihtuah tura intiam chungin an campaign hlawm a ni.
Heng harsatnate hi nikuma thalaite kaihhruaia lungawi lohna lantir, a tirah social media khapna dodalna avanga intan, thil danga pakai zelah pawh sawi lan nasat a ni a. Lungawi lote hian Nepal politic kalphung leh intluktlan lohna chi hrang hrang awm, a bikin politician fate khawsak dan sang em emte chu an sawisel a ni.
Lungawi lohna lantir lai hian mi 77 an thi a, BBC-in a chhuinaah chuan an ram police hotuin ralthuam keng lo mi sang tam tak lakah tharum na tak hman phalna thupek a chhuah niin a tar lang.
Mipuite hian a tawpah KP Sharma Oli chu an paih thla a. Prime minister atan a inzuar leh a, thlan nawn leh a nih a inrin thu a sawi bawk.
Inthlanah hian a party, CPN-UML chu pathumna chauh an ni lo va, kum 74 mi Oli-a ngei pawh hi Jhapa 5 bialah Shah-a’n a hneh a ni.
An rama democratic party hlun ber, Nepali Congress hruaitu thar, Gagan Thapa-a pawhin RSP candidate pakhat lakah a bial a hloh bawk.
Nepal-ah Shah-a kaihhruai RSP-in hnehna chang chiang ta
