Israeli Prime Minister Benjamin Netanyahu-a chuan a security cabinet-te nen an thutkhawmnaah Gaza Strip chu luah nawn leh a rawt niin an ram chanchinbuten an tar lang.
“Gaza Strip lak veka Hamas hneh kan tum,” tiin hotu sang pakhatin tual chung chanchinbumite a hrilh.
Army chief leh sipai hotu lian dangte chuan he ruahmanna hi an duh lo va, a hming tar lan loh sipai hotu chuan, “Kaltlangpui a nih chuan chief of staff chu a bâng ang,” a ti.
Hamas-in an la hren mek chhungte chuan prime minister rawtna ang hi chuan an chhungte nunna a tiderthawng thei dawn niin an ngai a, Gaza-a la hren 50 zinga 20 chu la dama ngaih niin ngaihdan laknaah Israeli palia pathum zelin inkahhai chu hruai haw lehna tur atana tha berah an ngai.
Israel-in a thawhpui hnai tak takte pawhin he rawtna hi demin indona titawp tur leh mihring tawrhna nasa lutuk tiziaawm turin an duh hlawm.
Israel-a venhimna hotu lawk tak tak dinhmun lo chelh tawh rual chuan Thawhtanni khan US President Donald Trump-a hnenah lehkhain indona titawp tura na zawka Netanyahu-a nawr turin an ngen.
Mi dang kaltlanga inkahhai atan leh mi hren chhuah theih nana mi dang kaltlanga Israel leh Hamas an inbiak leh hnu leh Palestinian hel pawlin video pathum tichhuaka an mi hren chak lo tak tak an tihlan hnuah rawtna thar hi siam a ni.
Mi thenkhat chuan chanchinbua Gaza luah tuma rawtna awm tihdarh hi inremna thar siam tura Hamas nawrna ni theiah an ngai.
Israeli sipaite hian Gaza 75% vel chu an luah mek sa a; mahse, rawtna tharah hi chuan a puma thununa mi chengte chu hmun khatah dah khawm a tel a ni.
Rawtna thar hi West Bank thenkhat awptu, Palestinian Authority thuneitute chuan an duh loh thu puang nghalin ram dangte pawh sipai chakna hmanga Gaza awp tumnaah hian inrawlh turin an ngen.
Palestinian-te chuan Israel mi nihna la vawngtu minister-ten Gaza luah leh Judate chenna tur hmun thar siam hi an tlangupui nasa niin an ngai a. Kum 2005 khan Israel hian Gaza Strip-a chenna an siamte thiatin sipai an dah pawh an la chhuak a; mahse, Egypt en a luhna hi chu an la thunun reng.
Tun hnaia ram eng emaw zatin Israel-Palestinian buaina awm reng chin fel nan ram pahniha then leh Palestine pawh ram pakhata pawm an tum mai thu an sawi hnuah Israel atangin rawtna thar hi a chhuak a. Palestinian-te chenna tur ram thar hi Israel hrula West Bank leh Gaza Strip niin an khawpuiah East Jerusalem tih a ni.
Kar hmasa khan UK leh Canada chuan France zawmin Palestinian-te tana ram siam mai hi an thlawp thu an lo sawi tawh a ni.
Israel hian October 7, 2023-a Hamas-in an ram beia mi 1,200 chuang an thah leh hren tura mi 251 an hruai phuba lain Gaza an bei tan a. Palestinian 61,020 vel thi an awm tawh a ni.
Netanyahu-a’n Gaza Strip pum luah a rawt thar
