Ram mipui tana chhenfakawm sawrkar a din leh theihnan, hmathlir thar leh mipui mamawh zirchiang chungin ‘New Age Congress’ turin an inbuatsaih mek tih Congress treasurer Dr Lalmalsawma Nghaka chuan a sawi.
Sinlung Hills Council (SHC) inthlan inpuahchahna atan SHC huamchhung khaw hrang hrang tlawhtu MPCC treasurer chuan mupuiin a thlate tuai tharin van sanga a thlawk leh thin angin Congress party-in hma thar a la dawn a, an tho kang leh dawn tih a sawi a. Congress party chu mipui mamawh leh mipui milin an insiamthar leh thin a, an hmathlir mipui mamawh milin an herrem thin tih a sawi.
“Tunhnai inthlan awm tawhah kan che tha lo hle a, mah se, chu’ng kan chak lohna chu inzirnan leh chona thar min petu a ni tih hria in, ram mipui tana chhenfakawm sawrkar a din leh theihnan nasa takin hmathlir thar leh mipui mamawh zirchiang chungin ‘ New Age Congress’ turin kan inbuatsaih mek a ni,” a ti.
SHC inthlan tura Congress candidate-te chu an hotuten uluk taka ngaihtuahna an sen hnua an bial theuh mipui tana nasa taka hna thawk thei tur leh mahni inhaivur tum loa mipui rawngbawl saka inpumpek tura rinte chhawpchhuah an ni tih Dr Lalmalsawma Nghaka hian a sawi a. Congress candidate-te thlantlin an nih chuan, Congress hi party dang pahnih hotuten thu an sut leh zung zung ang an ni ve loa, an intiamna an tihlawhtling thin tih a sawi.
‘New Age Congress’ buatsaih mek – Dr Lalmalsawma
