Australia leh New Zealand-a hmeichhe World Cup khelh mekah a thlengtu New Zealand chu last 16 lut zo lovin an tla. Pathiannia inkhelah si ruk fai ngawta Phillipines sawptu Norway in last 16 an lut. Inkhel dangah Colombia in Germany an hneh a, last 16 lut turin an dinhmun a tha viau tawh.
Group A an inching fel
Pathianni khan Group A a mite an inching fel a, a thlengtu New Zealand an tlak laiin Switzerland leh Norway in last an lut.
Point li hmua hmahruai mek Switzerland leh point thum hmu tawh New Zealand te chu Dunedin Stadium-ah an inhmachhawn a, last 16 lut turin New Zeland in chak an mamawh. An mualah hnehna chan ngei tumin tan an khawh a, entu mipui thahnem tak thlawpna tha tak nen an muala inlan ni bawk mah se hun tawp thlengin goal an thun thei lo. Hmahruai mektu Switzerland pawhin goal an thun thei bik lo va, goal awm lovin an inhnehtawk.
Goal awm lova an inhnehtawk vangin Switzerland in point nga hmuin last 16 an lut chiang nghal a, New Zealand pawh last 16 lut thei dinhmunah an la ding ve der der a, Norway leh Phillipines result-ah an innghat. Norway in si ruk fai ngawta khawchhak team an sawp vangin goal difference-a chhe zawk New Zealand tan puanthuah tel mai a ngai ta thung.
Group A-a inkhel dangah point khat hmu tawh ve ve Norway leh Philiipines te an inhmachhawn a, Norway in sik ruk fai ngawtin hnehn an chang a, last 16 an lut ta daih.
New Zealand lakah tlawm a, Switzerland inhnehtawkpui tawhtu Norway hian Phillipines lakah bul an tan tha viau a, chawlhlawk hmain goal thum an thum hman. Inkhel tan atanga minute rukna lekah Sophie Román Haug chuan hmahruaina goal a thun. Sophie hian minute 17-na leh minute 90=5-ahte goal a thun zui leh a, hattrick a siam hial nghe nghe.
Minute 17 chhunga goal hnih an thun hnuin minute 31-naah Caroline Graham Hansen chuan an goal thumna a thun a, si thum faia hmahruai chungin chawlhlawk an hmang.
Chawlhlawk hnu lamah Norway an khel tha chhunzawm zel a, minute 48-na lekah Phillipines player Alicia Barker chuan an lamah a ti-goal palh a, Norway goal lina a thun. Hemi hnu lawk minute 53-naah Guro Reiten chuan penalty atangin an goal ngana a thun zui leh zat bawk a, Sophie hattrick nen ri ruk fai ngawtin an chak zui ta a ni.
Si ruk fai ngawta Phillipines an hneh vangin Norway hian goal diference +5 ngawt an neih phah. An mahni ang thoa point li hmu ve New Zealand in goal diference-ah + an neih ve loh vangin beisei phak lo taka bul tan Norway hian last 16 an lut ta daih a ni.
Kum 1995 hnuah Germany an tlawm
Pathiannia inkhel dang, group H a inkhel hmuhnawm takah Colombia chuan hun tawp dawn tepa Manuela Vanegas goal thun hmangin team lian Germany an hneh. Colombia lakah an tlawm hi kum 1995 hnu lamah World Cup group Stage-a Germany tlawm hmasak ber a ni.
Sydney Football Stadium-a inkhel Colombia leh Germany te hi an inhnehtawk viau a, goal pawh a lut har hle. Inkhel hmuhnawm takah hian minute 52-naah Linda Caicedo chuan South American team hmahruaina goal a thun. Hun rei tak si an phurh hnuin minute 89-naah Germany in penalty an hmu a, penalty hi Alexandra Popp-i’n a pet goal a, an si phurh a sut.
Minute 89-naah 1-1 a an inhnehtawk vangin chak zawk an awm loh mai a rinawm hman viau. Hun pek belhah chak ngei tumin Colombia an inlan a, minute 90+7-ah Manuela Vanegas chuan Colombia tan goal pawimawh zet mai a thun a, team lian Germany chu 2-1 in an hneh zui ta a ni.
Germany an hneh vangin Colombia hian khelh hnih atangin point ruk an hmu a, last 16 lut turin an dinhmun a tha tawh hle. Group H-ah hian Colombia hian hma an hruai fal mek a, Germany leh Morocco in point ruk an hmu mek a, chak la nei lo South Korea an tla chiang tawh thung.
Inrinni khan Sweden in 5-0 ngawtin Italy an sawp a, France in 2-1 in Brazil an hneh ve bawk.
New Zealand an tla
