Site icon The Aizawl Post

New Zealand PM tharah Chris Hipkins la lut

Kum 44-a upa Chris Hipkins chu New Zealand prime minister 41 ni tura lakluh a ni ta a. Jacinda Ardern bang avangin prime minister ni turin an party chuan an thlang a ni.

Kum 42-a upa Ardern chuan ram hruai turin thahrui a nei tawh lo tia sawiin a bang a. Nilaini khan governor-general Cindy Kiro chuan a banna a pawm sak zui hnuah prime minister thar lakluh zui nghal a ni.

Hipkins hi New Zealand Covid-10 strategy duang tu ber niin a larpui hle a. Labour Party tena Ardern thlak tur kar kalta tawp lama an neihah Hipkins hi lungrual takin an thlang a, kumin October thlaa inthlanpui hmachhawn nghal tur an ni bawk.

Opinion poll lakah te chuan Labour party chuan inthlanah conservative opposition, National Party chu lar lamah an tluk rih lo hle nia tarlan a ni thung.

Mipui maktaduai nga vel chenna New Zealand hi Covid-19 avanga ramri khar hmasa ber pawl ram a ni a. Pandemic len tirhin hei vang hian New Zealand chu hripui len ve lohna hun rei tak nih phahin fak an hlawh hle a, mahse a hnuah zero-tolerance strategy chu Kiwi ho ten an ning zui thung a, a chhan ber pawh hripui kai pakhat hmuhchhuah vangin national lockdown te kalpui thin zel vang a ni.

Hipkins ngei pawh hian a hnuah lockdown khauh tak an kalpui kha rang zawka thlahdul tur an lo ni tiin a sawi bawk.
Ardern hnuaiah hian Hipkins hian education, police leh public service te pawh a enkawl tel bawk a.

Fa pahnih nei tawh niin ‘Chippy’ tia koh a ni a, Kiwis thawkrim tin te tan hun remchang tha intluktlang pek a tum thu sawiin, thawkrim tena nun tha leh hmasawnna anmahni leh an chhung tena an hmuh ngei theih nana thawh a tum thu a sawi.

Ardern hian a office hun hnuhnung ber chu Wellington hmar lama khawte reuh te Ratana chu politician leh Maori upa te nen an tlawh a. Ardern chuan backbench MP, unaunu leh nu nih a inring thlap tawh tiin a sawi.

Exit mobile version