September 27, Nilai zan khan English Carabao Cup third round khelh chhunzawm a ni a, Newcastle United chuan champion tura rinkai Manchester City an hnawtchhuak. Inkhel dangah team lian Liverpool, Arsenal leh Chelsea ten hnehna changin last 16 an lut ve bawk.
Champions League team hnih Newcastle United leh Manchester City te hi St-James Park-ah an inhmachhawn a, inkhel hmuhnawm an lantir. Newcastle manager Eddie Howe chuan 8-0 ngawta Sheffield an hneh tuma player 10 zet a thlak thleng a, khel tlem zawkte khelhna hun tha a siamsak. Season liam taa tre-ble champion Manchester City manager Pep Guardiola pawhin player pasarih ngawt a thlak thleng ve bawk. City hian St-James Park-ah bul an tan tha a, an forward Jullian Alvarez chuan goal thun theihna hun tha vawi hnih ngawt a hlah a, chawlhlawk hmain goal an thun thei lo.
Newcastle United manager Eddie Howe chuan chawlhlawk hnu lamah an player pawimawh Bruno Guimaraes leh Anthony Gordon a luhtir a, an khel tha sawt. Phur zawka inlan Magpies tan hian minute 53-na lekah Alexander Isak chuan Joelinton siamsak atangin hmahruaina goal a thun. Minute 53-naa goal an thun hi team lian lakah hun tawp thlengin an venghim thei hlauh a, hnehna hlutak changin last 16 an lut. City hnawkchhuaktu Newcastle hian last 16-ah inkhel hautak zawk an hmachhawn zui leh dawn a, final-a an hneh tawh Manchester United nen quarter-final luh an inchuh zui leh ang.
Liverppol in Lecester City an lehthal
Nilai zana inkhel dangah Liverpool chuan Anfield-a an mikhual Leicester City lakah si an phur hmasa zet a. Hnufual zawk ni chunga chawlhlawk an hman hnuin, chawlhlawk hnu lamah goal thum an thun a, an khingpuite lehthalin, last 16 an inhlangkai.
Anfield-a lenglut Leicester City hian rin phak bakin bul an tan tha a, inkhel tan atanga minute thumna lekah Kasey McAteer chuan Akgun siamsak atangin hmahruaina goal a thun nghal. Championship team lakah hma taka goal an chhuah hi Liverpool in an sut thei lawk lova, si khat faia hnufual chungin chawlhlawk an hmang phawt.
Chawlhlawk hnu lamah Liverpool an khel tha ta viau a, goal an thun thuai. Minute 48-na lekah Gravenberch siamsak atangin Gody Gakpo chuan goal thunin, an si phurh a sut. Goal an thun hnuin Reds an khel tha zui viau a, goal hnih an thun belh leh. Minute 70-naah an midfielder thar Dominik Szoboszlai chuan pui zetin a pet goal a, hma an hruai letna goal a thun. Si khata hma an hruai hnuin minute 89-naah Diogo Jota chuan Quansah siamsak tha zet chu inringtawk zetin a kheng goal a, an hmahruaina a tizau. Hun tawp thlengin goal dang a luh belh tawh lova, Liverpool hian 3-1 a hnehna changin last 16 an lut.
Lioverpool hian last 16-ah EPL club an hmachhawn zui leh dawn a, AFC Bournemouth an hmachhawn ang.
Arsenal leh Chelsea an chak
Champion tura rinkai zinga mi Arsenal chuan Gtech Community Stadium-ah Brentford an hmachhawn a, minute 8-na leka Reiss Nelson goal thun hmangin hnehna an chang a, last 16 an lut. Gunners hian last 16-ah London club West Ham an hmachhawn zui leh dawn a. London stadium-ah London derby khelh a ni ang.
Inkhel dangah EPL-a bul tan tha lo tak Chelsea chuan EPL a bul tan tha Brighton & Hove Albion an hmachhawn a, minute 50-naah Nicolas Jackson goal thun hmangin an chak a, Blackburn Rovers hmachhawn zui leh turin last 16 an lut ve bawk. Carabao Cup lama an chakna hi Blues hian insiamthat zui nan hman ngei an tum ang.
Last 16-a intum tur zingah season liam taah final-a intum Newcastle United leh Manchester United te intum turin ngaihven a hlawh a. Final rematch-ah Newcastle in Old Trafford-a an hmachhawn tur United hneh ngei an tum ang. Last 16-a intum tur zingah team lian pumpelhin Mansfield leh Port Vale te an inhmachhawn dawn a. Ipswich leh Fulham, Everton leh Burnley bakah Exeter leh Middlesbrough te an inhmachhawn bawk ang.
Newcastle in City an hnawtchhuak
