January 6, Inrinni zan khan English FA Cuup Third round khelh chhunzawm a ni a. EPL club Newcastle United leh Aston Villa ten hnehna changin fourth round an lut. a. Chelsea pawhin Stamford Bridge-ah awlsam takin hnehna an chang ve bawk.
Newcastle 3-0 Sunderland
Season kal meka beisei phak ta lo Newcastle United hi championship club Sunderland hmachhawn turin Stadium of Light ah an lenglut a. Mikhual an nihna hmunah si thum faiin an chak a, awlsam takin third round an paltlang.
Chak tura rinkai zawk ni chunga inlan Newcastle hian championship club lakah khel tha viau mah se goal thun an harsat a. Sunderland tlarhnung inremphui tak an su tlang hlei thei meuh lo va, an hmahruaina goal pawh own goal a ni. Minute 35-naah mualneitu player Danny Ballard chuan an lamah a ti-goal palh a, Newcastle hmahruaina goa a thunsak a, si khat faia hnufual zawk chungin chawlhlawk an hmang.
Chawlhlawk hnu lamah Newcastle an khel tha leh zual a, goal an thun belh thuai. Second half tantirh teah Magpies hian penalty an hmu a, he penalty hi Alexander Isak chuan a pet goal a, an goal hnihna a thun. Isak vek hian minute 90-naah an goal thumna a thun zui leh a, Mimualah si thum faiin hnehna an chang zui ta a ni.
Villa an chak ve ta nawlh
Kum sarih chhung zet FA Cup third round paltlang thei tawh lo Aston Villa chuan championship club Middlesbrough lakah harsa takin hnehna an chang nawlh a, third round an paltlang ve ta nge nge.
Riverside Stadium-a lenglut Aston Villa hian hun tha tam tak nei chungin goal an thun thei lo reng a, an chak zo lo leh teuh hle. An inkhelh nawn leh a ngaih mai rinna lian tak a awm hman laiin hun tawp dawn hnaih minute 87-naah Matty Cash chuan goal pawimawh zet mai a thun ta nawlh a. Cash goal hmang hian hnehna hlu tak changin, FA Cup third round an paltlang ve ta nge nge.
Aston Villa hi FA Cup-ah vawi sarih an champion tawh a. An champion hnuhnun ber tum chu kum 1957 daih tawh kha a ni. Third round ah bik an chak hnuhnun ber tum chu kum 2016 replay ah League Two Wycombe an hneh kha a ni a. Hemi hnu hian fourth round an thleng phak lo ngar ngar a. Inrinni zan khan Boro an hneh a, an mutan an kheng thla ve ta nge nge a ni.
Chelsea an chak awlsam
Team hausa, sum seng hnem chunga result tha nei hleithei lo Chelsea chuan FA Cup lamah awlsam takin hnehna an chang a. Si li fai ngawtin an mikhual Preston North End an hneh.
Chelsea hian an mikhual lakah goal an thun theih lawk loh hnuin Armando Broja chuan minute 58-naah hmahruaina goal a thun a. Hemi hnu hian Thiago Silva, Raheem Sterling leh Enzo Fernández ten goal khat theuh an thun belh leh a. Nuamsa taka hnehna changin fourth round an inhlangkai.
Newcastle leh Villa an tlang
