Daily Newspaper

Neymar an hrem

31

Marseille an hmachhawn tuma che mawi lo tak, Alvaro Gonzalez a ben vanga hnawhchhuah Neymar chu Ligue 1 thuneitu ten an chunah hremna an lekkawh zui a, game hnih khel thei lo turin an hrem.

Ligue 1 season thara khel chhe tak PSG hian an game hmasa berah kaithar Lens an hneh lo nghal ringawt a. An game hnihnaah che chhe tlung tak Marseille mikhual in, si khat faiin an hneh lo leh ringawt bawk. Marseille an hneh loh tum hian Neymar leh Gonzalez te inbakkaih vangin buaina lian tak a chhuak a, player panga ngawt hnawhchhuah an ni. He buaina chhuah dan chungchangah hian Neymar chuan chi inthliarna lam hawia beiah Gonzalez hi a bei a, an inpuh tawn viau.

Buaina chhuah vanga hnawhchhuahten hremna an tuar zui deuh vek a, Marseille player Dario Benedetto chiah hrem zui tuar lo a ni. Buaina chhuahna hnar nia puh theih PSG defender Layvin Kurzawa chu game ruk ngawt khel thei lo turin hrem a ni a, ani hi hrem tuar na ber a ni. Neymar, Leandro Paredes leh Jordan Amavi te chu game hnih khel thei lo turin hrem theuh an ni.

PSG tum a fuh lo zui zel a, nilai zanah season thara Ligue 1 hnehna an chan hmasak ber tum tawng bawk mahse an player pakhat chu hnawhchhuah a ni leh tho a, an player tha pali ngawt chhawr theih lohin an awm rih dawn tihna a ni. Champion lai PSG hian an mualah Metz an mikhual a, an chak zo lo leh teuh hle. Minute 65-naah Diallo hnawhchhuah a ni vangin an talbuai teuh hle. Hun tawp dawn tep minute 90+3-ah Jullian Draxler chuan an chakna goal a thun ta nawlh a, si khat faiin hnehna an chang ve ta hram a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy