NFL beih tum New York gunman-in a beih tum a hai!

NFL beih tum New York gunman-in a beih tum a hai!
CBS CCTV chuan silai hrawl tak keng mipa pakhat hi chhun engah kea New York kawtthlera a kal lai a la fuh a; he gunman hian Thawhtanni khan New York khawpui laili taka inchhawng sang (skyscraper) luhchilhin mi pali a kap hlum a; he khawpui Mayor Eric Adams-a sawi danin, silai keng hian a lua hliam a tawh phahna National Football League (NFL) zawk beih tum a nih thu thuziak a hnutchhiah niin a sawi a, mahse, a tum loh zawk a bei ta a ni!
Tualthattu hi Las Vegas lam mi kum 27-a upa Shane Tamura niin, American football league headquarters awmna building a beih hnu hian amah leh amah a inkaphlum nghal a; a mi thahte ruang bula a thuziak hnutchhiah atangin a lua hliam na tak a tawrh phahna NFL a dem hle tih leh an headquarters beih tum a ni tih a hriat theih a, mahse, he building-a NFL inbunna lai tak hi a lo hre fuh lo palh a, lift dik lo zawkah chuangin office dang a bei a, a tuar lo tur zawkin an tawrh phah ta a ni!
Hetia American-ho infiamna ngainat ber leh he rama infiamna lar ber American football (NFL) thuneitute beih a tum chhan leh a ni lo zawkin an tawrh chhan hi a lua hliam a tawrh chuan thluak natna chi khat CTE a thlen a, chu chuan rilru lam natna a thlen ve leh vang niin New York khaw mayor chuan a sawi.
Tamura hian rawlthar a nih laiin American football hi khel thin mah se inelna sang ber NFL erawh a khel lo tih a team-mate hluite chuan US media an hrilh.
Thi zingah hian kum 36 mi New York City police officer Didarul Islam pawh telin, he bulding-ah hian security guard hna thawk a, gunman hi tudai zo loin nunna a chan ta a ni.
Police officer thi ta hi Islam-a hi Bangladesh atanga US-a pemlut niin, fa pahnih a neih tawh bakah a nupui a rai mek a, an fa pathumna tur an beisei leh mek laiin a vanduai ta a ni.
City official-te chuan Islam-a thlahna tichhuak nghalin, New York Police Commissioner Jennifer Tisch chuan a hna tura an chhawpsak apiang tha taka hlenchhuak thin mi a nih thu leh hlauhawmah pawh intulut hreh lo a nih thu sawi chungin kha inkahnaah pawh khan biru mai loin misual tudai turin a chechhuak a, inpekna sang ber hlan chungin ‘hero’ nihna a hlawhchhuak tih a sawi.
Kahhlum ve dang pakhat hi finance giant Blackstone an tiha thawk niin, he nu hi an company lam chuan Wesley LePatner tiin an ko.
Thi dang pahnihte chu civil mi an ni a; he inbeihnaah hian nunna em chan lo mah se tualthattuin a tum ber NFL hnuaia thawk pakhat chu na takin a hliam thung tih he league commissioner Roger Goodell chuan a sawi.
He thil thlen laia Scotland tlawha zin mek US President Donald Trump chuan thil thleng pawi a tih thu sawiin, ngaihtuahna nei lo tharum thawhna rapthlak tak a zung nena phawi turin US law enforcement agency-te a beisei tih a sawi.
California lama high school a kal laia American football player lo ni ve tawh thin Tamura-a natna tawh CTE or chronic traumatic encephalopathy an tih hi lu lama hliam tawh nawn fo vanga thleng thei a ni.
ABC News tarlan danin, a mi thahte ruang bula a inkahhlum ve hma chiaha Tamura thuziak hnutchhiahah chuan ‘ka thluak hi khawngaihin lo zirchiang teh u’ tih a inziak a, “I’m sorry,” tih a hnutchhiah bawk niin an sawi.
He gunman hi Las Vegas atangin New York a inkahhl thleng a, kawtthler pakhat 345 Park Avenue an tihah assault-style rifle hmangin building chhawng sang a luhchilh a; skyscraper-ah hian lift hmangin chhawng 33-na a thleng a, tah chuan office pakhat a pawng kah ta vak mai a ni.
Mayor Adams-a sawi danin, zirchianna hmasaah chuan Tamura hian a beih tum ber he building chhunga NFL headquarters haiin he bulding neitu Rudin Management office zawk a luhchilh ta a ni.
Tualthahna thlen laia an thawm hre pha hmeichhe pakhat Nekeisha Lewis chuan a thiante nen plaza-a dinner an ei laiin silai kah thawm an hria a, “Indona hmuna awm ang mai kan ni,” a ti.
Lewis-i sawi zel danin, thawm a rik hnu chuan building chhuahsan tuma hliam tuar mipa pakhat tlan a hmuh thu leh a thil hriat leh hmuh chu a tawn tawh zinga la rapthlak ber niin a sawi.