Kulikawn Ngaizel kham lung tla thin laka a thlang kawngpui ana awmte leh kawngpui zawhtu mipui leh lirthei him zawkna atana lung tla thei mai tur kar thlak leh lung tla turte kawngpuia an tlak tlang mai lohna tura a kham tuam hna thawh tawh dan chu Nilaini khan PWD minister Vanlalhlana’n a enfiah.
Kumin July 8 &9 khan Ngaizela K Lalnghakliana Petrol Pump chhak lung leh lei chu nasa takin a tla a, thenfai hna thawh zui niin, August 12-14 inkar khan a hnawk zualpui then zawh a ni. Lung lian deuh la then bang chu khawl nen chhutkeh a ngai dawn a, muangmara tih zui tura a hnawk lo thei lai bera dah rih a ni.
Hnathawktu leh mipui him zawkna atan Ngaizel kawng hi hun engemawchen khar a ni a, mipui hman theihin August 14 tlai khan hawn a ni.
Ngaizel kham tuam (draped) na atana hman hi Green Draping HDPE (High Density Poly Ethylene) a ni a. Ruah leh nisa laka leilung a ven bakah leivung leh lung lian lutuk lo chu dang zo tura beisei a ni. Tun ami hi Mizorama vawikhat hmanna a nih avangin a daih rei zawng tur kum an sawi thei lo tih geologist-te chuan an sawi a, trial stage a la ni tih an sawi.
Kham tuamna atan Green Draping HDPE roll 13 hman niin, cheng nuai 19 sen a ni. ADDMA (Aizawl District Disaster Management Authority) lei a ni.
Ngaizel kawngpui zawhtu mipui leh lirthei bakah kawngpui ana chengte him zawknan sawrkar chuan theitawp a chhuah tih PWD minister hian a sawi a. Green Draping HDPE aia tha zawk leh tlo zawk tur ‘shotcrete’ hmanga lungtla venna tur shotcreting machine (wire mesh-a tuam a, cement, balu adt. chawhpawlha phuhna khawl) lei turin PWD lamin proposal an siam a, quotation koh mek a ni a, estimate nen an la thehlut dawn tih a sawi a ni.
Kum 10 kalta chhung khan Ngaizel kham lungtla avang hian mi pathumin nunna an chan tawh a; lirthei ke hnih nei leh ke li nei, a vaiin lirthei 16 a delh chhe tawh a, hliam tuar 8 an awm tawh bakah a thlang kawngpui ana awm in a delh chhe nual tawh a ni.
Ngaizel lung tla thei tur tuam zo
