Indian activist leh educationist, Sonam Wangchuk-a chuan tiam chin awm lova a chaw nghei titawp tura nawrna nasa tak tawng mah se tawpsan a la tum lo.
Kum 59 mi hi Zirtawpni thleng khan ni 20 chhung chaw a nghei tawh a, chi leh tui bak engmah ei lovin a rihna pawh kg kua a hloh tawh.
“Pawn lamah chak lo zel mah ila ka chhungrul erawh a chak em em a ni,” tiin Wangchuk-a hian lungawi loh a lantirna hmun, Delhi-a Jantar Mantar-a pung khawmte hmaah a sawi a. A thu sawi hi lawmtu leh kut beng thawm a ring hle.
Activist hian online satirical movement pakhat, Cockroach Janta Party (CJP)-in India-a zirna siam that an tlangaupui chu a thlawp mek a ni.
Zirtawpni khan CJP hian X-ah Wangchuk-a’n mipui pung khawm hmaa thu chunga thu a sawi lai video tawi te an dah chhuak a ni.
Wangchuk-a hi a lan danah chuan a chak lo hle a, aurinna hmangin thu a sawi a, a aw pawh a thawp hle a ni.
Pungkhawmte chu Thawhtannia CJP-in kawng an zawhna tura tel vek turin a sawm bawk.
“Kan zavaiin muanawm takin parliament panin kawng kan zawh ang a, mipui rorelna maichakah kan ngenna kan thlen dawn a ni,” a ti.
Activist hian fiamthu thawh zuiin, kawng zawh hmaa a lo thi hlauh a nih pawhin ‘ka thlarau talin a rawn zawm ang che u’ tiin a sawi.
Lungawi loh lantirtute chuan Union Education Minister Dharmendra Pradhan-a chu May thlaa doctor zir tuma admission hmu thei tur zawnna exam zawhna a put avang leh exam that a ngaih avangin bâng turin an phut a. Minister hian a mawhah lain a bân ngei an duh a ni.
Pradhan-a CJP leh a thlawptute chu ‘thil kal pangngai tibuaitu B-team an ni’ tiin a sawi a. Prime Minister Narendra Modi-a kaihhruai sorkar chuan lungawi lohna lantirtute hi an la dawr lo bawk.
Hetih lai hian eptute leh khawthlang huap pawlte chuan sorkar chu an duh anga che turin an phut na hle tawh.
Ningani khan Delhi chief minister hlui, Aam Aadmi Party (AAP) hruaitu, Arvind Kejriwal-a chuan Wangchuk-a hi a hmu.
CJP-in video an tihchhuahah chuan Kejriwal-a hian activist hi chibai a buk a, sorkar chu lungawi lote dawr turin a phut bawk a. “Kum tin exam zawhna a put a, thalaiten an tuar thin,” a ti a. “Sorkar hi zirlaite leh Wangchuk-a thu ngaihthlaksak turin ka ngen a ni,” a ti bawk.
‘Pradhan-a chu a chanvo atanga paihin a aiah Wangchuk-a hi dah tur’ a ti bawk.
Jammu & Kashmir chief minister, National Conference party hruaitu ni bawk, Omar Abdullah-a pawhin ‘politic chuan hmun a nei a; mahse, mihring inlainatna leh ngaihthiamna chuan hmun a chang ngei tur a ni’ tiin a sawi ve bawk.
Kum 2011-a Anna Hazare-a’n Delhi-a chaw a nghei tum kha chuan khatih laia Congress kaihhruai United Progressive Alliance (UPA) khan a dawr turin minister-te a tir tih a sawi bawk.
“Pu Wangchuk-a erawh dawr tuma chet chhuahna engmah a la awm lo,” tiin Abdullah chuan a sawi a, activist-in a thil phutte chu ‘dan ang taka tih theih’ a nih thu a sawi.
Ningani khan Delhi High Court chuan petition ngaihtuahin sorkar chu inrawlha Wangchuck-a hriselna dinhmun pawh thlithlai turin a ti a, a tul a nih chuan enkawlna pawh pe turin a ti.
The Times of India chanchinbu chuan union health ministry-in sorkar damdawi in pathum chu ni tin a dinhmun vawi hnih endik turin a hriattir tawh tih a tar lang.
Ngenna tam mah se Wangchuk-a’n chaw nghei chhunzawm
