Daily Newspaper

NGHILH LOH TUR MIZORAM STATE GAMES 2019 KHA

7

HP Zonunsanga

Mizo te hi infiamna ngaina tak kan nih rualin, a huhova infiam hona runpui hi kan lo nei ngai lo hle a. State kan nih atanga chhiar a kum 33 kan tlin hnu ah, Sport Minister chak leh a ngaihna hria Pu Robert Romawia Royte hmalakna zarah Mizoram State Games 2019 neih turin Cabinet Meeting, April ni 23-a neih chuan a rem ti ta rup mai a ni.

Chu mi bawhzui chuan May ni 6, 2019 ah District level committee te, Block level committee, organizing committee for implementation in State Games te chu sawrkarin notification chhuahin a ruat chho ta mup mup mai.

Apex Committee (State Level Implementation and Monitoring Committee) thuneitu sang tak member 21 awmna a ruat te ruat chhoh niin, chutah chuan Minister, Sports & Youth Services dept chu Chairman a ni a. State Level Organizing Committee Chairman a Sport Minister tih chu Sept ni 23-ah Secretary SYS inthlak that a ni leh thung. State Level Organising Committee-ah hian member 15 an awm a ni. “Hma lakna hrang hrang te neih chhoh niin; Sub-Committee on opening and Closing ceremony te, Technical & monitoring committee te, sub Committee on Advertisement and sponsorship te, sub Committee on information, public relations and media coverage te chu October ni 17-a sawrkar notification hmangin a kengkawhtu tur ruat a ni ta bawk.

Tin, State Level Implementation and Monitoring Committee Oct ni 7 thukhawm chuan, Constituency chhunga buaipui tur leh a tul anga constituency contingent-te puala state level Organising Committee dawr turin constituency level Organising Committee siam an rêl a; Constituency Organising Committee-ah chuan bialtu MLA chu chairman an ni ang, tiin a rel bawk.

Kan MLA rualte kan Chief Minister hovin an bial chhung atanga infiammite tel tur buaipui leh bial inelna a ni tur hi an phur hle a, Chief Minister in a tuipuizia tilangtu chiang tak chu October ni 10 khan East I bial chu an bialtu MLA, Chief Minister hovin hmalak Dan tur relin, Chief Minister Conference Hall-ah an thukhawm hmasa ber a, he hunah hian East I bial chhunga Local Council leh Branch YMA hruaitute an tel a ni.

Mizoram State Games 2019-ah December ni 9-13, 2019 a neihah hian infiammi 7,447 an tel a, Sports Discipline 32 a awm a, event 221 a awm a, Inkhelhna hmun (venue) 24 a awm bawk a ni. Indigenous game hi a huang anga dah lovin a chi hrang anga dah ni phei se chuan inelna hi a vaiin 32 ni lovin 42 a tih theih hial a ni. Discipline chi hrang 32 hnuaiah hian mipa bik inelna 132 a awm ang a, hmeichhe inelna bik 88 awmin a vaiin inelna chi 221 a awm. Team Game, Mimal inelna hrang hrang – athletics, Combat sports, aquatics,etc., te bakah Mizo Infiamna bik( Indigenous Sports) te pawh a State Games-ah hian a awm kim hle a ni.

Mizoram State Games 2019 hi November ni 9 tlai dar 3:30 ah Chief Minister Pu Zoramthangan Rajiv Gandhi Stadium-ah ropui takin a hawng a. Constituency aiawh a lo kal ten parate neiin, Constituency flag kengtu leh placard kengtuten hma an rawn hruaiin, music rimawi karah hlim takin ban vaiin mipui te chibai an rawn buk a ni. He mi hnu hian chief guest Mizoram Chief Minister zahawm tak Pu Zoramthanga State Games hawn nan flag a pawt pharh a. Mizoram State game 2019 chu tan a ni ta ni. Flag mawi taka cheiah hian a zeh mawina hi constituency hming zawng zawng ziahchhuah vek a ni. Chief Minister Pu Zoramthanga chu khuallian a nih bakah; Deputy Chief Minister Pu Tawnluia chu Khualzahawm a ni a, Sports Minister Pu Robert Romawia Royte chu uaptu a bawk. Mizoram State Games 2019 hawnna ah hian Air show te, zaithiam zai leh mipui mit leh beng titlai tak tak program siam a ni.

Chief Minister bial Aizawl East I mipa infiam mite intihsiakna zawng zawngah an tel kim vek laiin, Tuichawng bial atangin hmeichhe infiam mi pakhatmah an tel lo thung. “Infiam mi tir tam bial te :
Aizawl East I 198(M) +117(F) = 315
Aizawl East II 90(M)+103(F) = 293
Aizawl North I 87(M)+92(F) =279
Infiam mi tel tlem bial te:
Tuichawng 48 (M) +0 (F) = 48
Thorang 58 (M) + 17 (F) = 75
West Tuipui 58 (M) + 19(F) = 79
Aizawl khawpui pawn bial atanga infiam mi tel tam bial te :
Champhai South 178 (M) + 80 (F)= 258
Champhai North 131(M)+83(F) = 214
Kolasib 137 (M) + 72(F) = 209
Tuirial 152 (M) +57 (F) =209
Infiam mi tamna game te :
Football -1116
Volleyball -900
Indigenous – 362
Infiam mi tlemna game te :
Snooker -15
Fencing -23
Body Building -23
Sepaktakraw -33

Mizoram state games medal hmasa ber hi Siaha constituency atangin T Malsawmkiman mipa 10000 meter intlansiak atangin a la a ni.

Central Sawrkar lam pawhin Mizoram State Games hi an ngaihven hle a. India ram Sports thuneitu sang ber, Sports Authority of India pawhin thlithlaitu (Scout) te inkhelh chhung zawng hian an rawn duty kual tir a, December ni 12 khan Sandeep Pradhan IRS, Director General, Sports Authority of India chuan infiamna neihna hmun tlawhin a kal kual a ni.

Mizoram State Games-ah hian MLA tel pahnih an awm a. Mizoram Youth Commission chairman leh Lunglei North bialtu MLA Dr Vanlaltanpuia chu a bial aiawhin Tennis-ah a rawn khel a. Transports Minister leh Champhai South bialtu MLA TJ Lalnuntluanga chuan Table Tennis a rawn khel.

Pu V. Thanchhunga (K -69) Serchhip chu an bial aiawhin Mizopa Sairawkherh perhah a tel a, Mizo inthuam chawisan a duh avangin Mizopa inthuamin intihsiakna a hmachhawn.

Pu C. Lalruaia (K-89) Aizawl N III aiawhin Mizopa Sairawkherh inperhsiakah a tel a. Pu C. Lalruaia hi Mizo zinga Olympian kan neih te zinga mi thalkah thiam C.Lalremsanga pa a ni.

Lalthansangi Sailo, Aizawl East II chuan Table Tennis atangin Gold Medal pathum a an bial tan a laksak.

Mizo Sairawkherh inperhsiak-a Aizawl North III aiawh C Lalhruaia, kum 89 mi hi intihsiak tel zinga upa ber a ni a, Bronze medal a la nghe nghe a ni. Sialsuk Constituency aiawh a tel, Vanlalchhuani kum 71 Sialsuk, Aizawl South III chu inkawibah-ah telin hmechhia tel zinga upa ber a ni bawk. Aizawl South II aiawha tel Laltlankimi Vangchhia, kum 8, Tuihleuh intihsiak tel chu a naupang ber a ni bawk.

Champhai North Constituency aiawh a tel Dawremthanga kum 62 Hmunhmeltha khua chu ram pum huap intihsiaknaah kum 1981 leh 1985 khan a lo tel tawh a, inbuanah gold a la ve ve tawh bawk. Kum 1990 khan Inchai leh Inbuanah Silver medal a dawng tawh bawk. Tun State Games 2019 hian tel mahse a inhliam avangin medal erawh a dawng ta lo a ni.

A hnute pe lai thlalak a tanga ram pum hriat hlawh ni ta, Volleyball inkhelh laia nau hnute petu, Lalvenhimi, Tuikum Constituency (Chhiahtlang) hi fa pakhat nei a ni a, B. A. zirlai a ni. Volleyball hi kum ruk lai a khel tawh, Pro-division Club, Bethlehem Vengthlang VC player a ni mek bawk.

December ni 13 a lo her chhuah chuan Mizoram pum huapa infiam mite fuankhawmna ropui ber, constituency 40 te intihsiakna, Mizoram chhunga Infiamna kutpui lian ber Mizoram State Games 2019 chu khar a lo ni dawn ta. Sipai Lammualah he kharna hun hi hman niin Mizoram Governor P.S. Sreedharan Pillai chu khuallian a ni.

Governor P.S. Sreedharan Pillai chuan Mizoram State a pian hnua State pum huap Infiamna Kut lian ber hlawhtling taka huaihawt a ni chu thil chhinchhiah tlak tak a ni a. MLA 40 rual ten phur taka an bial team te an buaipui chu thil danglam tak leh state dang te tan pawka entawn tlak a ni a. Mizoram MLA te an chhuanawm hle a ni, tiin kharna thu a sawi a ni.

Mizoram State Games 2019 kharna inkhawm hi Pu H.Lalengmawia, Secretary, Sport &Youth Services in a kaihruai a. Chief Minister Pu Zoramthanga chuan Mizoram State Games 2019 Souvenir a tlangzarhin thusawina a nei a, Sport Minister Pu Robert Romawia Royte in hun a hmang bawk. State Games 2019 Closing programme-ah hian Deputy Chief Minister Pu Tawnluia, Minister te, MLA te leh Infiammite an tel a. Ropui takin State Games 2029 hi khar a ni.

State Games kharna hunah hian Champion, Runners-up te leh mimal inelna bika Best Athlete(Hmeichhia) leh Best Athlete(Mipa) te hnenah lawmman hlan a ni. Mizoram State Games 2019 a MLA Constituency 40 intihsiakte zingah 25 Gold, 18 Silver, 16 Bronze Medal Medal latu Aizawl East – I Constituency Contingent te chu Champion-ah puan an ni a. Anni hian Mizoram State Games 2019 Champion Nomawi chu an chawi ta a ni. Aizawl West – I Constituency Contingent, 21 Gold, 10 Silver leh 18 Bronze Medal latu chu First Runners-up ah puan an nia, Aizawl East- II Constituency Contingent 17 Gold, 11 Silver leh 23 Bronze Medal latu chu Second Runners-up an ni thung a ni. Mimal inelna bikah 3 Gold leh 1 Silver Medal latu chu Nl. Elisian Madai, Lunglei East chu Best Athlete (Hmeichhia) ah puan a ni a. Gold Medal 5 latu Pu Lalsangliana, Aizawl South-I chu Best Athlete (Mipa) ah a ni thung a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy