Daily Newspaper

Ngunhnam aiah Pen

22

Silai a rik takah chuan, silai veka lo chhanlet loh chu Mizoram tan tih theih dang a awm tawh lo. Chakai pawh hi man tuma veh veh chuan, a kaw tawpah a sahimna turin theihtawpin a lo tang thin. Assam hian Mizoram hi silai hmetpuak ve lo thei lovin a dang chep a ni.

Assam lamin Mizoram sipai duty-na hmun an luahlan a. Tum nei sa rana Mizorama lut an nihzia pawh hliam tuar leh ruang phur tur ambulance an rawn hruai thlap dan atang khan a langchiang tawk hle. An sipai paruk zetin an thih phah a, thiamchan tumin TV leh chanchinbu lamah an la tuan zui zel a, dawt tinrengin Mizoram an hekin an sawichhe zui a. A hnuah ramri bulah sipai thami tam tham tak a la chhawp hnai tak deuh deuh a.

Assam sawrkar hian helai ramri inchuh buaina hi dawhkan kila inbiakna hmanga chinfel tum lova, tharum hmanga ramri buai hi chinfel a tum tlat a nih chuan, Mizoram hian duhthlan tur dang a nei dawn lo tih pawh a lang chiang sa. Chu chu Assam sawrkar pawhin a hrechiang a, hrechiang chunga hetia hma la zui zel ta pawh a ni.
Assam hian Mizoram lam chhaih thinrim a, silai hmetpuak hmasatu-ah tantir a, media kaltlanga beihzui hrep kha an htiltum niin a lang bawk.

Eng pawh ni se, thufing pakhatin ‘Ngunhnam aiin Pen-in thil a tithei zawk” (The Pen is mightier than the Sword) a ti a. Chumi awmzia chu, ralthuam leh tharum thawhna aiin thuziakin thil a tithei zawk, tihna a ni awm e.

Ramri inchuh buai avanga India ram state pahnih innghirnghona hi ram leh ram innghirnghona boruak ang a ni lo tih hriat a tha. Chuvangin, engti zawng pawhin Ngunhnam hmachhuan aiin Pen chelek thiam hi a pawimawh zawk tih hriat hi a finthlak zawk ngei ang. Pen hian ‘thuziak’ chauh hi a huam lova, ‘tawngkam fimkhur’ thlengin a huam vek awm e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy