Lunglei khawthlang lam, NH-302 kawng chhiat thawmthat chungchanga hmalakna kal zel dan ngaihtuahin Thawhlehni khan High Powered Committee Lunglei vice chairman Lawmawma Tochhawng kaihhruaiin thukhawm a ni. MLA Dr K Pachhunga, district bawrhsap Ramdinliani, SP Lunglei Rahul Alwal, addl DC Donny Lalruatsanga, ZDU Lunglei leh Chhimthlang Maxicab Association hruaitute, NHIDCL leh an hnuaia contractor BRN Infrastructure Pvt Ltd te an tel.
Tunlai ruahsurin NH-302 kawng a tih chhiat avangin Lunglei khawthlang maxicab service zawng zawng chuan siamthat a nih loh chuan July 24 atang khan thu leh awm hma chu tiamchin awm loa service loh nise, tih an rel a. Tun tum thukhawmah hian BRN Infrastructure hian maxicab service loh chhung hian thawktute leh hmanrua lakhawmin July 26 -28 chhung khan kawng siam hna hi thawh chhunzawmin tun dinhmunah kawng hi duhthusama siam ala nih loh avangin, August 4 zing dar 6.00 atanga August 6 zing dar 6.00 chhung lirthei – MMV leh HMV (407 chunglam) tlan phal a ni dawn loh tih an thlen.
Contractor hmasa SRK Construction-in hna an chhunzawm theih tak loh avangin an hna hi BRN Infrastructure hian a thawk chhunzawm a. Khawl leh thawktute pawh a hmunah indah fel tawhin, hna hi an tan thei tawh a, amaherawh chu lirthei veivak a tam thin a, a bikin lirthei lian chi a tan thin avangin an khawl hmanga hnuhchhuah a ngai thin a, hei hian an hnathawh a timuangin kawng siam hna tluang taka an thawh theihna’n 407 truck chin chunglam tlan rih lo turin mipui an ngen a ni.
NH 302 kawng thawmthat nan August 6 thleng khar dawn
