NH 306 thawmthat mek CRRI
team-in zirchiang phawt dawn
National Highway 306 & 06 a kawngpui thawmthat mek chu Central Road Research Institute (CRRI) Team-in an zirchiang anga, an report dan azirin thawmthat zelna tur sum chu NHIDCL hmunpui lamin a rawn pe chauh dawn niin Mizorama NHIDCL hotute chuan an sawi.
Kolasib district tantlang National Highway 306 & 06 a kawngpui thawmthat mek chu chak zawka thawh a nih theihnan Kolasib bialtu MLA, deputy speaker Lalfamkima hoin sawikhawm a ni a. District administration hotute, NHIDCL hotute leh an hnuaia contractor-te, Joint Village Council aiawh a kaihhnawih sawrkar department dang aiawh an tel.
Deputy speaker chuan ram leilung dinhmun chu hman atanga hriat tawh a ni a, tuna chhuanlam atana siam a ni leh thin chu pawi a tih thu a sawi a. Chhuanlam siam chuan tawp hun a nei dawn loh avangin, a taka hmuh theiha an thawh a ngai tawh tiin NHIDCL leh contractor-te a hrilh.
Kolasib district hmun hrang hrangah lirthei tan kawngpui chu zawh tlak loh khawpin a awm a, heng siamna atana hun an pawhsei zel chuan working season chhungin hnathawk hman loin an awm dawn a, a theih anga a tul ang ang bawhzui rang turin NHIDCL aiawhte chu a hriattir a. NHIDCL thawktute telin a hma thei ang bera ama hoa kawng ena thawh chhuah nise a ti bawk.
NHIDCL general manager BK Srivastava-a’n kawngpui thawmthat dinhmun a that theih loh chhan a sawi a. Lei chhung atanga tui lo put, motor overload-a tlan thin ho, kawng siam tirha lung chang tha ni lo leh hmanraw tha tawk lo hman leh chhan hrang hrang avanga kawngpuia tui tlingte an ni ber tih a sawi a ni. Hemi enfiah turin leh a chhiat zualna zirchiang turin CRRI team an lokal anga, chumi zirchianna report azirin an hmunpui lam atangin kawng siam zelna tur sum pawh an rawn pe chhuak dawn tih a sawi a ni.
Kawngpui thawmthat hna contractor 5-in an thawh mek erawh an chhunzawm zel anga, a chhe zual lai zirchian chu CRRI survey-in a huam tur a ni tih a sawi.
NH 306 thawmthat mek CRRI team-in zirchiang phawt dawn
