National Highway Infrastructure Development Corporation Limited (NHIDCL) hnuaia NH6 siam mek chu Inrinni khan Khawzawl district bawrhsap CC Lalchhuangkima chuan Inrinni khan a hmunah a endik a. Puilo khaw daia View Point Tower sakna tur lung a phum nghal.
Bawrhsap chuan kawng siamtu company-te chu leilung leh nungchate ngaihtuah reng chunga hna thawk thin tur leh lui humhalh tlat turin a chah a. View Tower chu kawng siam zawh hunah chuan zin veivakte hiptu ber tur leh zin tinuamtu a nih dawn avangin lawmawm a tih thu a sawi.
Anusha Projects Private Ltd (APPL) company-in NH6 kawng an siam meka leivung an paih dan leh, Tuisen lui tichhe lo tura hmalak dan turte bawrhsap hian a sawipui a. APPL hian an theih chinah gabion wall an siam thute, lui tui luang tichhe thei tur lung lian leh leivung luia lutte pawh an thenfai mek thu te an sawi. Bawrhsap rawtna angin remchang hmasa berah leivung an paihna hmunah thing an phun tur thu an sawi bawk.
NHIDCL hmalakna in Puilo khaw daiah View Point Tower sak a ni dawn a. Tower hi NH6 kawng siam mektu Dhariwal Builtech Limited company-in a siam ang. Tower hi Zopa chhiarin chhawng 5-a sang a ni dawn a. Tower bakah caretaker awmna tur, mipa leh hmeichhe inthiarna tur leh lirthei park-na tur a awm tel dawn. Tower san zawng hi lei atangin metre 17.4 a ni dawn a, NH6 siam zawh ruala hawn hman tum a ni.
Ministry of Tourism kaltlangin Assistance to Central Agencies for Tourism Infrastructure Development hnuaiah NHIDCL hian hmarchhak state 6-ah view tower sakna tur a hmuh atangin Mizoramah pawh 9 sak a ni dawn a. Sak zawh a nih hunah Tourism department-in a enkawl chhunzawm ang.
Bawrhsap hian DBL company-in kawng siamna tura quality testing a kalpui dan a hmunah a endik nghal a, an laboratory result-te pawh a enfiah. DBL company hiam Amrit Sarovar hnuaia dil siam turah CSR angin dil pakhat a thlawnin khaw thenawm remchang tan an siamsak theih tur thu bawrhsap hi an hrilh.
NH-6 kawng siam hna thawh mekin environment a nghawng dan enfiah
![](https://theaizawlpost.org/wp-content/uploads/tap_logo-min-large.jpg)