- PWD minister
NH44A laih chhunzawmna
tur central-ah kan dil mek
- PWD minister
Mamit district-a National Highway 44A laitute nen court-a an inkhin mek laiin, a laih chhunzawmna tur pawh sawrkar laipuiah an dil leh mek tih PWD minister Vanlalhlana chuan a sawi.
Zirtawpni khan PWD minister hian Tuidam leh Darlak inkar kawng chhia thawmthat dan tur enin a tlawh a. Khawtlang hruaitute nen an inkawmnaah Hachhek tlangdungin kawng nuam leh zau an nei dawn emaw tih laiin, NH 44A laitu, Gayatri Infrastructure chu an hna a chhiat avangin chawlhtir an ni a, kawng hluia kal ala ngaih phah ta tih a sawi.
Kawng zim takah balu phur lirthei lian nitin 40 vel an kal bakah mipui chakkhai phur leh zin veivak lirthei a kal reng bawk a. Tun maia harsatna tihziaawmna atan PWD-in cheng nuai 20 a sanction a, boulder nen tangdunin PWD-in a thawmtha dawn tih a sawi a ni.
NH 44A, Lengte peng atangin kawng thawmthat hna hi kum khat chhung atan tender chhuah thin niin, tunah hian NIDHI Creative Infrastucture Pvt. Ltd-in an thawk mek tih PWD minister hian a sawi a. National highway laih avanga kawng hlui cheithatna tur fund, Ministry of Road Transport & Highway-ah ‘one time improvement’ dil ni a, NH 44A chawlhsan tawh pawh MoRTH ah vek hian balance work dil mek a ni tih a sawi bawk.
“Tunah hian NH 44A laitute nen Aizawl District Court-ah kan inkhing mek a, he kawng laih chhunzawmna tur cheng vaibelchhe 24 hi MoRT&H emaw Mizoram PWD account-ah emaw a awm theihnan hma lak a ni a, court thutlukna ngaihchan mek niin, a fel ve leh kawng re-tender tura hma lak lehnghal a ni ang,” Vanlalhlana hian a ti.
Tuidam leh Darlak inkar kawng chhia hi km.6 vela thui niin, pavement concrete cement-in km.1 siam tawh a ni a, nitin balu phur lirthei lian 40 velin zawh thin ang an ni tih PWD hotute chuan an sawi.