NHIDCL laka lungawi lohna lantir
Thawhtanni khan Joint Action Committee on National Highway (JAC), Kolasib te’n kawng siam chungchangah a siamtu NHIDCL laka lungawi lohna an lantir.
JAC hian NHIDCL office hual hnatlang an ko a, NHIDCL office an pan kawngah police-te nen an innawr a ni.
JAC hian thuchhuah an siam a, Kolasib District kawngpuite hun rei tak a chhiat tawh avangin Kolasib-a Y4K, MUP, MZP leh lirthei hmanga eizawng pawl hrang hrangin February ni 5 khan Joint Action Committee on National Highway an din a, NHIDCL office hual hnatlang hi an ko tih an sawi.
ZPM-in JAC chu opposition party-te fuihpawrh tiin an sawi a, hei hi pawi an tih thu sawiin JAC chuan, “… ZPM Thalai General Hqrs, Information and Publicity Dept. Press Release, Dt.16.02.2026-in ‘Kolasibah opposition party fuihpawrh theih thalai thenkhat te’n kawng zawhin, hmasawna kawng siam hna thawk mektute tan harsatna siam zawngin hma an la…’ tih hi JAC on National Highway chuan pawi a ti a. JAC te hmalakna hi eng party mahin a fuihpawrh vang a ni lo a, Kolasib hmangaihna vanga pawl hrang hrang inzawmkhawm ten Kolasibin kawng chhia a tawrhna a nasat tawh em avanga rilru na leh NHIDCL te’n Kolasib min hmusit em avang leh min tham loh em avanga hma la a ni tih hi Mizoram mipuite hian hria se a ti a ni,” an ti.
Hnatlang neiha telte chungah lawmthu an sawi a, hetiang hun hmanna atana phalna pe tu Kolasib DC lakah pawh lawmthu a sawi.
NHIDCL laka lungawi lohna lantir
