Daily Newspaper

NHM hnuaia thawkten hlawh la thei lo July 10 hmaa pe turin thuneitute kar

12

Aizawl, July 3 : National Health Mission (NHM) hnuaia thawktu mi 1665 chuan hlawh an lak theih loh avangin lungawilohna lantirin an hnathawhnaah badge dum an bel dawn a, 2020 July 10 hmaa hlawh hi pek an la nih loh fo chuan na zawka kar an tum tih an sawi.

NHM hnuaia thawkte hi contract-a rawih an ni a, hlawh lak theih loh ang chi hi kum engemawzat chu an lo tawng tawh thin a, thla 6 chhung an lak theih loh changte pawh a awm tawh tih NHM thawktute chuan an sawi.

Covid leng mekah pawh NHM hnuaia thawkte hi a hmatawng zingah telin, doctor, nurse, health worker, laboratory technician, pharmacist, X-Ray technician, driver leh office staff thlengin an ni a, an vaiin 1665 an ni tih an sawi.

An hlawh leh a kaihhnawih chungchangah hian, sawrkar laipui inkaihhruaina danah chuan state sawrkara sum a luh atanga ni 15 chhungin NHM account-ah pekchhuah thin tur a nih laiin, kum 2013-2014 atanga NHM sum state sawrkar (treasury) kaltlang a nih atang khan rei tak tak state sawrkar hian a hreng thin tih NHM thawktute hian an sawi a ni.

‘Hetiang a ni chung leh kan thiante tam tak, nunna thap leh mutmu pawh tuah tha hman loa ramri leh damdawi ina an thawh mek lai hian, hlamchhiah kan la ni foa, kum 2019-2020 chhunga NHM tana sum lokal atangin vawiin thleng hian cheng nuai 3865 (sawrkar laipui atanga lokal leh state sawrkar tum tur 10%) hi Mizoram sawrkarin a la hreng a, hei vang hian NHM hnuaia thawktu tam zawk chuan May leh June 2020 thla hlawh an la thei loa. Thenkhat chuan April 2020 atangin hlawh an la thei lo tawh a ni,’ an ti.
Hetianga sum hren khawtlai a nih thin avang hian central atanga sum dawn tur hi a vaiin dawn theih a nih thin loh thu te, 2020-2021 chhung pawh hian NHM sum hren khawtlai vang hian 1st instalment hmuh theih a nih loh thu leh 2nd instalment hmuh tur pawh engemawzat a tih tlem rin a nih thu an sawi.

Sawrkar laipui Ministry of Health & Family Welfare-in Record of Proceeding (RoP) approval 2020-2021 a pek anga kumin April atanga June thla hlawh an lak nghal theihna turin Mizoram sawrkarin NHM sum a hren chu pekchhuah sak tur leh; Ministry of Health & FW-in RoP approval a pek anga hlawh leh hlawhpunna state sawrkarin a la pek lohte pe nghal turin an phut tih an sawi a ni.

Hei bakah hian regular post ruak a awmin NHM hnuaia thawktute hi Health ministry duhdan anga a ngheta luh theih dan tur ruahmanna siamsak turin an ngen tih an sawi bawk.

July 3-10 thleng hian NHM thawktute hian badge dum bela an lungawilohna lantir an tum a, hemi chhunga an ngenna tihhlawhtlin a nih loh chuan kum tam tak an lo tawrh tawhna avangin na zawka hma lak an tum tih an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy