Daily Newspaper

Ni 10 chhungin NH-54 chhe lai hnawh turin intiam

10

Buichali leh Thingdawl inkar kawngpui, National Highway 54 chu a enkawltu NHIDCL hnenah ni 10 chhunga kawng chhe zual lai hnawh vek turin Kolasib district bawrhsap Dr H Lalthlangliana chuan a hriattir a. Kawng chhe siam turten hmanrua an dah hmuh tur a awm mumal lo chu a hriatthiam loh thu a sawi bawk.

Kolasib district magistrate ni bawk Dr H Lalthlangliana hian Thawhtanni khan a district huam chin engemawzat tel Buichali leh Thingdawl inkara kawngpui a tlawh a. Sawrkar laipuiin NH-54 enkawl tura a tih tak NHIDCL (National Highways & Infrastructure Development Corporation) hnenah, kawng khuar chhe zual lirthei tluk hlauhawm laite chu mihring nunna atana hlauhawm nia a hriat avangin ni 10 chhunga hnawh vek turin a hriattir a; kawng siam hna chak zawka kalpui a nih theih nan ni 10 chhung hi chhunlamah kawngpui a kharsak dawn tih a hrilh bawk.

Thudawn danin, Thingdawl leh Buichali inkar kawng thawmthat hna hi sawrkar laipui Ministry of Road Transport & Highways hnuaia NHIDCL hian thawkin Lailapur atanga Sairang inkar kawngpui thawmthatna tur cheng vaibelchhe 25 pawh a hmu tawh a, he sum hmang hian tualchhunga contractor pahnih – JR Construction leh C Lalhluna ten kawng thawmthat hna hi an thawk a ni.

Kolasib bawrhsap hoa thutkhawm an neih tawhah contractor-te hi hmanrua inchhawp khawl tura hriattir an nih laiin, tun tuma bawrhsap-in a endiknaah hian hmanrua an dahkhawl a hmu lo a, ni 10 chhunga a chhe zual lai thawmtha turin ziaka intiamkamna a neihpui nghal nia thu dawn a ni.

Thawhtanni tlai khan NHIDCL leh an hnuaia contractor-te bawrhsapin a kohnaah ruahmanna siam nghal a ni a. Chak zawka kawngpui chhe lai siam a nih theih nan NHIDCL-in a dil angin ni 10 chhung Buichali lei bulah zing dar 5.30 leh tlai dar 5.30 inkar kawng khar a ni anga, Khamrangah zing dar 6.30 atanga tlai dar 6.30 thleng khar a ni ang. Hemi chhung hian naktuk – Nilaini atangin he kawngah hian lirthei eng chi mah, kawng siamtute lirthei bak tlan phal a ni dawn lo.

Aizawl lam atanga chhuklam tan Bualpuiah zing dar 6.30 leh tlai dar 6.30 inkar kawng khar a ni bawk dawn bawk a; Thingdawl leh Bualpui inkar bik hi chhun dar 12.00 atanga chawhnu dar 1.00 inkarah lirtheite tan kawng hawn a ni ang.

Silchar atanga Aizawl chho lam tan Thingdawlah zing dar 5.30 atanga tlai dar 5.30 inkar khar a ni bawk ang. Lirthei tlan vel tan Serkhan Bagha road kawng hawn phalna sawrkarah dil tum a ni a, Serkhan Bagha kawng dinhmun hi Thawhtanni vek khan Kolasib SP chuan a enfiah nghal a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy