Rural Development & Administration Minister Prof Lalnilawma chuan nimin khan thuthar thehdarhtute kawmin, ni za inhlawhna kan tih mai MGNREGA kalpui dan Central-in a rawn zam thar chungchang a sawifiah a; Job card holder ten dik taka hna an thawh a pawimawh tiin a sawi a.
National Mobile Monitoring System (NMMS) hmang-a hnathawk attendance lak chungchangah, zing lama attendance-a mi 20 thlalak (eng zat pawh ni se) kha, tlai ban dawna mi 20 an tlin leh loh emaw, midang hmel daih te a lo lan khan, kha mi nia inhlawhna kha ‘Hnawl’ (Reject) theih a ni a. Reject a nih chuan thawk lo anga ngaih a ni ang. Mipui ten kan mawhphurhna dik taka kan hlenchhuah a pawimawh dawn a ni, minister chuan a ti.
Tun hma kum sawm vel kaltaah khan Job Card chungchangah leh hnathawh dan chungchangah thil dik lo leh fel lo kha a tam Thin hle a. Kum 2011 chho bawr vel kha a ni ta awm e, chanchinbu hrang hrangah Job Card dik lo chungchang nasa taka tarlan a nih avangin Chief Secretary khan Job Card enfiah hna thawk turin district tin thuneitute a hriattir a. Uluk taka endik a nih hnuah, Job Card holder 1,70,085 aTangin Job Card dik lo 7,153 hmuhchhuah niin paih nghal a ni a. Job Card dik lo hmuhchhuah hi za zela 4 (4.2%) a ni. Sawrkar thuchhuahin a tarlan danin, heng Job Card 7153 paih tak avang hian kum khat chhunga sorkar sum mipui chanai luangral tur cheng nuai 1,537.89 humhim anga chhut theih a ni.
State dangah pawh dik lo hi a lo tam ve Thin hle a nih a rinawm a, hnathawk tur thlalak te, thawh zawh hnua thlalak te a han ngai ta a ni a, a manganthlak hle a ni. State dangah dik lo taka thil ti duh an lo awm a nih pawhin, Kristian zaa deuhthaw awmna anga chhal theih aTanga Job Card lem sangsarih chuang hmuhchhuah te, darkar riat hna thawk tura ngaih kan nih laia thawh hun bituk tling lo taka thawh a han ni tlat te hi inenfiah kan ngai nasa hle a ni.
He MGNREGA hnuaia Land Development kalpui danah pawh hian, Danin ‘cultivable land ni lo, ram chhia leh kalsan tawh hmun te chei that nan-a thawh tur’ a tih laiin, mimal huan, ram Tha lai kan han hmang mauh Thin te hi, missionary tirchhuak tam state tih atan chuan a zia lo hle a ni.
‘Dik takin aw..’ tih lawm lawm ngaia kan awm chhan hi, Job Card holder-te thiam loh vek hi a ni lo a, Dan awm sa zawm mai tur kan nih laia a zawm lo zawnga kaihruai tlattu, Job Card holder-te kilkawitute lam hi a pawimawh hlei hlei chu an nih hmel. Lui pawh a hnar lam a fim chuan a mawng lam pawh a fim thla zel mai Thin an tih kha maw!
