Ni 100 inhlawhna pe turin phut

Ni 100 inhlawhna pe turin phut
Ni 100 inhlawhna la pek chhuah loh chu sawrkarin pechhuak thuai turin an phut tih Congress Thalai chuan an sawi.
Congress Thalai Hqrs. thuchhuak chuan, ni za inhlawhna chu ZPM sawrkarin a batsak mek a, mipui sawrkar siam tura inzuarten mipui an zah loh zia a tichiang tih a sawi.
‘ZPM sawrkar hian thingtlangmite inhlawhna, October 13 – November 13 inkar, ni 26 chhung hi a rang lama pe chhuak tur leh December 7 thlenga an thawh mek pawh batsak loa pe tla nghal turin kan phut a. Krismas bazar-na kawnga harsatna pawh a rang lamin ZMP sawrkar hian chhuanlam siam loa pe chhuak turin kan ngen a ni,’ a ti.
MGNREGA chu 2005 August 23-a pawm, sawrkar laipui Congress kaihhruai UPA sawrkara Prime minister Manmohan Singh hnuaiah February 2006 khan Rural Development minister Raghuvansh Prasad Singh chuan Parliament-ah bill a thehluh hnua hman a ni tih Congress Thalai hian sawiin, ‘Thingtlangmite hmasawnna hnathawh, an inhlawh tawhna sum lehzel ZPM sawrkarin a it a, a hreng khawtlai hian mirethei zawkte chhipa vaivut takngial pawh an it tawh zia chiang takin a tarlang a ni,’ a ti.