Daily Newspaper

Ni 102 hnuah New Zealand-in Covid-19 kai nei ve ta

13

New Zealand chuan an khawpui lian ber chu Covid-19 kai mi pali hmuhchhuah an nih tak avangin a lockdown zui nghal a, tihian ni 102 virus kai awm miah lova a awm chu a tawp ta bawk.

Auckland khawpuiah virus kai thar hmuhchhuah a nih tak avangin ni thum chhung lockdown kalpui a ni ta nghal a. Heng virus kai thar pali te hi chhungkaw khat vek niin khawiahmah zin veivak lo an ni bawk.

Nimin atangin lockdown tan zui nghal niin thuneitute chuan he chhungkuain contact an neihte an chhui chiang zui nghal a ni.

Auckland-a chengte chu pawn chhuak lova an chenna Ina tawm tura ngen nghal niin nitin mamawh dawr tih loh chu khar nghal tur a ni bawk a, ram pum huapin social distancing regulation chu kalpui nghal tur a ni bawk.

New Zealand hi Covid-19 beihletna kawngah ram chhuanawm tak niin February thlaa virus kai an neih hnuah a kai 1,220 leh nunna chan 22 chauh an la nei a ni.

Thawhlehnia Covid-19 kai thar an hmuhchhuah hma kha chuan ni 102 lai virus kai miah lovin an awm hman a, hetiang ang ram hi an awm lo hial zawk.

Virus kai 22 an hmuhchhuahte pawh ram dang atanga New Zealand lut quarantine sa an ni hlawm a. Khawvel huapin fak an hlawh a, sorkar pawhin March thlaa lockdown restriction a siam tawh chu a thlahdul deuh vek tawh a ni.

Lockdown hma taka kalpui nghal a, ramri kharphui leh hriselna lama hmalakna chak tak bakah test nasa taka leh huapzo taka kalpui chu New Zealand chet that chhana ngaih a ni a. Mahse, khawvel pumah Covid-19 kai an tam zel avangin inthlahdah lo turin sorkar chuan thuchhuah a siam thung.

Lockdown puan a nih hnuah Prime Minister Jacinda Ardern chuan khauh taka chet lak nghal a ngaih thu a sawi zui a. Auckland hi mihring maktaduai 1.6 chenna niin fimkhur thuah lockdown a ni zui nghal a ni.

Auckland-ah hian level 3 alert system kalpui nghal niin hmun dang zawngah chuan level 2 kalpui a ni thung a. “Hei hi kan beisei lawk sa a ni” tiin Ardern chuan a sawi.

“Ni 102 lai virus kai lovin kan awm a, New Zealand tan chuan kan fihlim emaw tih mai awl tak a ni. Keini anga ram dang zalen an awm miah lo va, keini chuan ruahmanna kan nei a, kan neih sa avanga him kan ni” tiin a sawi.

Director-General of Health, Dr Ashley Bloomfield chuan virus inkaichhawnna hre fiah turin ni thum tal lockdown a ngaih thu a sawi a. “Virus kai hi an awm kan rin sa a ni a, a rang thei ang bera hriat kan tum a ni bawk” tiin a sawi.

New Zealand hma hian Vietnam chu ni 99 chhung virus inkaichhawn awm lovin an lo awm tawh a, July thla khan kum 57 a upa chu Covid-19 a kai tih hmuhchhuah a nih hnuah thla tawp lamah meuh chuan Da Nang khawpui chu virus epicentre a ni der tawh a ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy