Ni 200 hnuah ASF vanga vawk thi awm lo

African Swine Fever (ASF) vangin Mizoramin vawk a sing tel kuminah a chan a, tun hnaiah a zia ta deuh. ASF vanga vawk a thih loh ni te pawh a awm ta.
AH&Vety department chhinchhiahna enin November ni 23 khan Mizoramah ASF vanga vawk thi a awm lo a, May ni 6 hnu-a vawk thi a awm loh vawi khatna a ni.
May ni 6 atang khan ASF vanga vawk thi hi ni tin a awm a, November ni 23, a ni 202-naah vawk thi a awm lo. November ni 24-ah pawh vawk thi hi a awm lo leh.
Ni tina vawk thi zat a tlem ta deuh a, vawk suat (cull) zat pawh a tlem ta deuh. October ni 27 khan ASF vanga vawk suat a awm lo a, hei hi May ni 6 hnua vawk suat a awm loh vawi khatna a ni. Ni 186 chhung ni tin vawk suat a awm hnuah vawk suat a awm ta lo a, mahse a hnuah vawk suat hi a awm leh.
October ni 27 hnuah vawk suat hi a awm leh tho a, November ni 24-ah a awm lo leh; hemi ni hian vawk thi leh vawk suat a awm lo. May ni 6 hnua vawk thi a awm loh ni hmasa ber November ni 23-ah kha chuan vawk pakhat tihhlum a ni.
Ni 23 leh ni 24-ahte vawk thi a awm lo a, mahse ni 25 leh ni 26-ah a awm leh; ni 25-ah vawk 25 a thi a, vawk 16 tihhlum niin, ni 26-ah vawk pahnih a thi a, vawk 13 tihhlum a ni.
AH&Vety department-in an chhinchhiah danin, November ni 26 thleng khan kuminah ASF vangin vawk 14766 a thi tawh a, vawk 24057 tihhlum a ni tawh.
Kuminah January thlaah ASF vanga vawk thi a awm lo a, kuminah February ni 9-ah he hri hi finfiah a ni. April leh May vel atangin a hluar a, kum laihawlah a nasa zui zel. Kum tawp lamah a zia ta deuh a, AH&Vety department lam chuan a zia zel an beisei.