Ni 36 hnuah vawk thi leh

ASF a reh vang vang a, ni 36 chhung he hri vanga vawk a thih loh hnuah Mizoramah vawk a thi leh a, mahse hri hi a darh rih lo.
Nikum December ni 11-a vawk a thih hnuah ASF vangin kum thar January ni 15 thleng khan Mizoramah vawk a thi lo a, mahse January ni 16-ah vawk thi a awm.
AH&Vety department atanga thu dawn danin, January ni 16 khan Serchhip-ah ASF vang hian vawk pakhat a thi a, vanneihthlak takin he hri hi a darh lo.
2025-a ASF vanga vawk thi hmasa ber kha March ni 20-a mi a ni a, kuminah nikum aiin he hri hi a inlan hma. Thlasik laiin ASF hi a na lo thin a, kuminah chuan Mizoram vawh ber thla ni thin January-ah ASF vanga vawk thi a awm.
ASF (African Swine Fever) hi 2021-ah Mizoramah finfiah a ni a, chumi hnuah chuan kum tin a leng. Thlasik laiin a zia thin a, nikum pawh khan November leh December vel atangin a zia.
ASF hi vawkah chauh ni lovin sanghalah pawh hmuh a ni a, kuminah pawh sanghalah hmuh a ni tawh. Thentlang ram hmun hrang hrangah sanghal ruang 15 vel hmuh a ni a, kumina ASF vanga vawk thi hmasa ber finfiah ni January ni 16-ah vek khan Thentlang rama sanghal thih chhan hi ASF a ni tih finfiah a ni. 2021 leh 2024-ahte khan sanghalah ASF hi finfiah a lo ni tawh bawk.
AH&Vety department hotute chuan ASF hi Mizoramah a awm tawh a, chuvangin he hri hi rawn lang leh thin tura ngaih a nih thu an sawi a, chenpui thiam zir a ngai an ti.
Fimkhur vangin hri hi a nasa lo thei a, rei tak tak a rawn lang lo thei tih te an sawi a, tanrual a ngaih thu an sawi.
Kum liam ta 2025-ah khan ASF hi a nasa vak lo a, vawk 9711 a thih bakah vawk 3620 tihhlum/suat a ni. Hrilen hmasak ber kum 2021-ah khan vawk 33417 a thi a, vawk 12568 tihhlum a ni bawk.