Ni hnih chhungin chetsualnaa nunna chan 6

Ni hnih chhungin hmun li-a chetsualna thlengah mi parukin nunna an chan a, mi panga thihna hi Inrinnia thil thleng a ni.
February 21 chhun khan Thenzawl Vengthar naupang pathum an venga mimal dil pakhatah an tlahlum. Thudawn danin, chhun dar 12.00 vel khan thian pali chu dilah hian an kal a. An zinga pakhat hian chawhnu dar 12.30 velah inah a let san. Let ve lo te hi an chhungten an chin an hriat loh avangin an zawng a, chhuna an kawm zing ami inah a lo haw tih an hriatin an zawtchiang ta a, a thiante hi dil/tuia an luh thu a sawi. Tlai dar 6.00 rik dawn tawhah dil hi an pan a, a kotlangah an pathum slipper a lo inrem a, dil hi an lut nghal a ni.
Tui awm hi patling awm chen vel nia sawi a ni a, an ruang hi inhnaih te te in an hmu a ni. Nunna chante hi – H Lalhriattluanga (9) s/o H Laldawngkima, H Lalmuansanga (9) s/o Lalthangpuia (L) leh C Lalbiakhluna (7) s/o Lalfakzuala an ni. Thenzawl Vengthar Hall-ah an vai hian lumen an ni a, kohhran lawina a inan loh avangin anmahni inah theuh vui an ni.
An tlakhlumna dilah hian nidangah pawh naupang ho an kal fo nia sawi a ni a, an ni pathum hi, a tu emaw dilah hian a invai buai anga, chumi chhan tuma an beihnaah an pathum hian nunna an chan ta nia rin a ni.
February 21 chawhnu dar 3.10 vel khan Aizawl Zotlang thlanmuala company hnuaia hna thawk Bola (55), Nunsuri, Lunglei district chu an hnathawh mekna ko leiminin a chhilh a, theih anga ranga lak chhuah ni mah se, an lakchhuah theih hun dar 4.10 velah chuan a nunna chhan hman a ni tawh lo tih sawi a ni.
February 21 zan khan Francis Lalruatfela (36) h/o Caroline Saidingpuii Sailo, Tlangnuam Veng chu scooter-a chetsual vangin a thi. Thudawn danin Francis-a hi a thianpa nen a hnathawhna Serchhip atangin Aizawl panin Inrinni khan an inphurchhuak a, kawngah chesualin a hnunga chuang Francis-a hian hliam na tak a tuar a, Thingsulthliah damdawi in panpui a ni a, heta tang hian Ebenezer Hospital panpui niin, a thluakah thi a tling nasa tih sawi a ni. Hemi zan dar 7.15 hian a hliam tuar loin a thi.
Pathianni – February 22 chawhnu dar 12.50 vel khan Lalchungnunga (26) s/o R Vanlalruata, Zemabawk East chu bike-a chesualin a thi. Thudawn danin Lalchungnunga hi a vahte pahnih nena inphur an ni a, chawhma dar 11.00 vel khan Zemabawk North huamchhungah anmahni tawk zawnga tlan truck hnuaiah an tleng lut a ni. A hliam enkawl turin damdawi in panpui nghal ni mah se, a hnu reilote ah a hliam tuar loin a thi. A phurh pakhat hi a malpui a tliak a, damdawi inah enkawl a ni. Pakhat dang hi chu an tluk hian a per chhuak a, a him thung nia sawi a ni.