Daily Newspaper

Ni hnih chhungin Mizoramah Hri kai 44, dama chhuak 28

31

Inrinni leh Pathiannia result tihchhuahah Mizoramah Covid-19 kai mi 44 hmuhchhuah an ni a, hri kai avanga enkawl hmuna enkawl mi 28 chu dam tawhin an chhuak ve thung.

September 19 khan ZMC-a RT-PCR sample endik 1504 atangin hri kai pakhat hmuhchhuah a ni a. Tuikual North Aizawla cheng, Vishal dawr, Bawngkawna thawk a ni. Covid-19 hri kaite taksaa lanchhuah dan (symptoms) a neih vanga inringhlel, sample inlaktir a ni. Hri a kai tih finfiah lai hian symptoms a nei tawh rih lo thung. Hri a kaina hriat theih ala ni loa, a thawhna Vishal dawra kalte contact tracing tih mek a ni.

September 19 zana TrueNat laboratory-a sample endik dang zingah Lunglei district-ah hri kai hmuh thar 20 awmin state dang atanga rawn lut vek, Assam Rifles 17, Kawmzawl quarantine facility-a awm mekte leh, hnathawk tura rawn lut civil mi pathum – sawrkar quarantine facility-a awmte an ni. An vai hian Covid symptoms neilo an ni.

Kolasib district-a TrueNat hmang bawka endikah hri kai pahnih hmuh niin, Chhattisgarh leh West Bengal atanga lokal, quarantine facility-a awm lai, symptom neilo ve ve an ni.

Lawngtlai district-ah TrueNat hmang bawkin hri kai 4 hmuh an ni a, state dang mi, ramri bula kawng siam hna thawk tura lokal an ni a. Jharkhand mi vek niin, quarantine facility-a awm lai, symptom nei lo vek an ni.

Mamit district-ah Tripura atanga Mizorama lo lut chu Kanhmun screening point-ah Rapid Antigen Test hmanga endik atangin hri kai tih hmuhchhuah a ni a. Symptoms a neilo.

Kolasib district-ah mi pahnih, Bairabi screeing point atanga hmuhchhuah, Cachar leh Hailakandi district, Assam mi, truck driverte hri kai tih hmuhchhuah an ni ve bawk.

September 18-ah ZMC RT-PCR laboratory-ah sample 1244 test a ni a, hri kai hmuh thar 6 an awm. An vaiin Aizawl distric-a sample lak, tualchhung atanga kai, travel history nei lo vek an ni.

Tuithiangah mi pali, positive contact atanga kai, symptoms neilo an ni a; home quarantine lai vek an ni. Kulikawnah mi pahnih, positive contact atanga kai pakhat awmin, a kaina la hriat rihloh pakhat a awm. Symptoms neilo ve ve, home quarantine lai an ni.

RAgT hmangin Aizawl district-ah mi pahnih, Bihar atanga lokal R Dengthuama Hall Mualpui transit point-a hmuhchhuah, symptoms nei lo leh, RAY Falkland Quarantine Centre-a awm BSF mi, symptoms nei a ni.

District hrang hrang TrueNAT laboratory-a hri kai hmuhchhuahte hi, Lungleiah mi 5, Assam Rifles vek, Assam atanga lokal, quarantine centre a awm mek an ni a, symptoms nei lo an ni.

Serchhip district-ah pakhat, Nagaland atanga lo kal, Sainik School Chhingchhipa quarantine lai, Prem Kram Infracon company hnuaia thawk, symptoms neilo a ni.

September 19 khan hri kai avanga enkawlna hmun CCC/DCHC a dah, dam tawh mi 16 an chhuak a, CCC Hnahthial atangin 8, CCC Siaha 1, SRHF-ZMC 6 leh DCHC Champhai 1 a ni.

September 20-ah dam tawh chhuahtir mi 12 an awm bawk a. CCC Pukpui Lunglei atangin 1, SHRF-ZMC atangin 11 an ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy