Ni tin Indian mtd 67-in fuel pump tlawh ziah

Ni tin Indian mtd 67-in fuel pump tlawh ziah
Union Petroleum Minister Hardeep Singh Puri-a chuan ni tin Indian maktaduai 67 dawnin fuel station an tlawh ziah tih sawiin ram thanna chak tak chuan energy a mamawhna pawh a tisang zel tih a sawi.
India thanna dinhmun sawiin Puri-a chuan khawvela economy lian ber palina ni phak tawhin ramin sum a thawh chhuah chu $ tluklehdingawn sang 4.3 a tling tawh a, tangka kum 2025-26 chhungin 7.8-a thang tura beisei mek a ni tih a sawi.
“India hian ni tin tuialhthei barrel maktaduai 5.5 a mamawh ziah tawh a, hei hian energy kan mamawhna a tichiang hle a ni,” tiin Puri-a hian Thawhlehni khan X-ah a tar lang.
Minister hian India-a gas pipeline inthlun zawmna awm mek, km 24,500-a thui chu tihsei hna thawk mek zel niin kum 2030-ah chuan km 33,000 siam hman tum a ni a, hei hi energy inpek zung zung tiawlsamtu tur a ni tih a sawi.
Ujjwala Yojana hnuaiah chhungkaw vaibelchhe 10.60 chuang hnenah LPG connection pek a ni a, piped natural gas (PNG) hmangin chhungkaw vaibelchhe 1.55 thlunzawm an ni tawh tih a sawi bawk.
“Ram pumah CNG station 8,300 vel bun tawh a ni a, lirthei maktaduai telin ni tin tangkai takin an hmang mek a ni,” tiin union minister chuan a tar lang.
Energy him leh thianghlim, daih rei zawk hman tam a nih theih nan India-in hma a la mek zel tih Puri-a chuan a sawi a. Compressed biogas (CBG) plant 114-in hna an thawk mek a, green hydrogen leh sustainable aviation fuel (SAF) siam chhuah theihna tur hmun siam hna pawh chak taka thawh mek zel a ni tih a sawi bawk.
Puri-a chuan Prime Minister Narendra Modi-a kaihhruaina hnuaiah India-a energy sector chuan kum 2047-a ram changkang nih tuma hma lam a pan mek kawng a zawh mek zel zel tih X-ah hian a tar lang.
Puri-a hian sorkarin tuipui kama tuialhthei leh boruakalhthei hai chhuahna tur 99% hawn tawh a nih thu leh tuialhthei thlitfim loh lak luh thin pawh a hmaa ram 27 chauh dawr thin kha tunah chuan ram 40 chuang atanga an lak luh tawh thu a lo sawi tawh.
“India-in energy zinkawng a zawh mek hi ban pawimawh tak tak palia innghat a ni a. Thlitfim loh lak luhna huang zauh, thil thar chin chhuahna, ram chhunga tuialhthei leh boruakalhthei hai chhuahna tihpun leh a thianghlim chi, Green Hydrogen Mission kalpui bakah Ujjwala chhungkaw vaibelchhe 10.60 hnenah prime minister scheme hmanga LPG man tlawma leitir zel a ni,” a ti.