Daily Newspaper

Ni tin lirthei sing sarih vel Aizawlah

19

(POST NEWS SERVICE)

Traffic jam vanga harsatnain Aizawl a tibuai thin a, lirthei a pun zel avangin kawng pawh a tawt deuh deuh. Aizawl khawpuiah lirthei hi a tam a, lirthei thar pawh hmun dang aiin Aizawl khawpuiah a pung chak.

Traffic police te’n an chhut dan chuan, Aizawl khawpuiah hian ni tin lirthei 76,138 vel a tlan thin a, intlan chhawk hma phei chuan nuai chuang a tlan thin.

Aizawlah hian lirthei 1,97,468 vel a awm anga chhut a ni a, chung zinga 38,494 (20%) vel chu thingtlanga hralh tawh te, tlan ngai tawh lo te ni-a ngaih a ni. Chuti a nih chuan Aizawla tlan thin lirthei 1,53,974 vel a awm tihna ang a ni.

Traffic police te chuan lirthei 1,53,974 zinga 7,699 chu a neitute’n an hman rim loh, tul bik thila an hman chauh angah an ngai a, chu chu Aizawla khaw chhunga tlan thin lirthei zawng zawng zinga 5% a ni. Tichuan lirthei tlan pangngai chu 1,46,275 vek a lo ni ta a ni.

Lirthei hi an intlan chhawk a, number kawpkim leh kawpkim lo an intlan chhawk avangin lirthei tlan thin 1,46,275 chu pahnihin an sem a, Aizawl khawpuiah lirthei 76,138 chu ni tina tlan thin zatah traffic police te chuan an chhut a ni.

Aizawlah hian lirthei tlan zat a tam fal a ni mai lo a, lirthei thar pawh a tam fal. Transport department-in an chhinchhiah danin kumin hian July thla thleng khan Mizoramah lirthei thar 12069 ziahluh (register) a ni a, chung zinga 7354 chu Aizawl khawpuia mi a ni.

Aizawl khawpui tih lohva lirthei ziahluh tamna Lunglei District-ah chuan kuminah July thla thleng khan lirthei 1064 ziahluh a ni chauh a, Mamit District-ah chuan lirthei 290 ziahluh a ni.

Traffic police te chuan Aizawl khawpuia lirthei chevel hi kawngpui tam lam leh a thui lam nen a inmil loh avangin traffic a jam hma an ti a, lirthei hi rei lo te a din hlek pawhin a nghawng thui an ti bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy