Mizoram kawngpui pawimawh, ni tin mamawh thil lakluhna kawng pawimawh a chhiat avangin thla hmasa atangin Mizoramin harsatna a tawk a, lirthei tlan tho mah se ni tin mamawh thil hrang hrang a la tam tawk thei lo.
Kawng chhia an siam avanga lirthei dintir a nih lai leh chumi hma, kawng a chhiat avanga lirthei an tlan hleih theih loh lai, September thla laihawl velah khan ni tin mamawh thil a harsa tawh a, lirthei dintirte tlantir an nih hnuah pawh a la harsa.
Dawrkaite sawi danin, thla hmasa atang khan bawnghnute (amul gold) a harsa reng a, a thlen pawhin mamawh khawp a awm ngai lo. Tel a vang a, tun hnaiah a vang ta lo deuh, mahse a man a to. Wai wai pawh lak tur a awm lo thin a, tun hnaiah erawh a zia.
Online hmanga thil chah pawh kawng chhia hian a nghawng a, thla hmasa atang tawh khan thil chah a thleng hlei thei lo. A thawkate pawh an chawl fo a, rei tak tak chawlh chang te pawh an nei.
Tun hnaiah Mizoram atanga thil chah 30000 vel chu phai lam atangin an ‘cancel’ a, hei pawh hi kawng chhiat vang a ni. Thudawn pakhatah chuan, hei hi Mizoram kawng chhiat vang bik ni lovin, hmun dangah tuilian leh harsatna dang a awm vang a ni tel.
Tuialhthei pawh mamawh khawp a awm thei lo a, filling station hrang hrangah intlar a ngai reng. A enkawltute chuan kawng a chhiat avangin tanker te’n kawngah hun an hmang rei a, hei vang hian petrol leh diesel hi a tam thei tak tak lo tih an sawi.
Buhfaiah harsatna a awm rih lo a, Food, Civil Supplies & Consumer Affairs department lam chuan buhfaiah harsatna a awm loh thu an sawi bakah harsatna a thlen an rin loh thu an sawi.
Buhfai hi October-a sem tur a awm a, thla thara sem tur pawh a awm thuai an beisei. Eirawngbawlna gas-ah harsatna a awm lo tih an sawi a, buhfai leh gas chungchangah manganna tur a awm rih lo tih an sawi.
Ni tin mamawh thil la hnianghnar tak tak lo
