Ni zung chakna hmangin tui pump
Nizung chakna hmanga tui lakna, ‘Tlangpui/ Tlangmawi Water Supply Scheme (solar pumping)’ chu Zirtawpni khan PHE changtu deputy chief minister Tawnluia chuan Zirtawpni khan a hawng.
Deputy chief minister chuan Tlangpui leh Tlangmawi khuaten tui intur thianghlim hnianghnar taka an tlan thei tawh tur chu a lawmpui takzet tih a sawi a. Thalah pawh tui harsatna an tawk lo turah a ngai tih a sawi. Heng khaw pahnih mipui tanrualna leh thawhhona tha a hmuhin lawmawm a tih thu a sawi a; in tinin tui litre 38 tal an nei thei vek tura ngaih a ni tih a sawi bawk.
Tlangpui leh Tlangmawi khua chawmtu tur ni zung chakna hmanga tui lak hi Jal Jeevan Mission (JJM) 2021- 2023 hnuaiah cheng nuai 551 senga thawh niin, 2021 July 26 atanga thawh tan a ni a, 2022 December 26 a thawh zawh tura ruahman a nih laiin, 2022 December 16-a zawh a ni. Heng khaw pahniha in tinah tui hi pipe hmanga pek vek a ni a, he project hi mihring 1373 leh chhungkaw 228 chawm zo tura ruahman a ni.
Ni zung chakna hmanga metre 798 a sanga tui pump hna thawktu contractor hi Rhb General Enterprise an ni a. Funding agency hi NABARD RIDF-XXVI a ni. Nikhat chhunga tui lirtres 66000 pump thei tura ruahman a ni a, tui lakna atan hian ni zung chakna lakna tur, solar power plant 335 W bun a ni.
Tlangpui khua ah hian in 169 awmin mihring 1000 vel an cheng a, Tlangmawiah hian in 48 awmin mihring 250 vel an cheng a ni.
Ni zung chakna hmangin tui pump
