Nicki Minaj album thar ‘Pink Friday 2’ chu Billboard 200 (albums) chart No.1-ah a debut a, he chart-a a album No.1 kai thei pathumna niin, hmeichhe rapper zinga he chart-a No.1 kai thei album ngah ber a ni ta a ni. Minaj hian 2012 khan a album ‘Pink Friday: Roman Reloaded’ chu No.1 kaipuiin, 2012-ah ‘Pink Friday’ a lo No.1 pui tawh bawk. Minaj hian chart top 10-a lang thei album pasarih a nei tling ta bawk a ni.
Billboard 200 chart hi kar khat chhunga US-a album hralh that dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Pink Friday 2 hi kar khat chhungin US-ah 2,28,000 hralhin, chung zinga 1,29,000 chu streaming atanga album hralhna tlukpui (on-demand official stream maktaduai 169.87) a tling a, album tak tak hralh chu 92,000 niin, album-a hla mal hralhna atangin 7,000 a tling thei bawk.
Taylor Swift album, chart No.1 pawh lo ni tawh ‘1989 (Taylor’s Version)’ chu 1,09,000 hralh lehin No.2-ah bawk a la awm a, mak ve angreng takin tun hi Swift leh Minaj te chart top two-a an awm dun vawi ngana a ni tawh. A hmasa ber chu January 2011 kha niin, chutah chuan Swift a;bum ‘Speak Now’ a No.1 a, Minaj album ‘Pink Friday’ a No.2 a, chumi hnuah January 2015 khan Swift album ‘1989’ chu No.1 niin, Minak ‘The Prinprint’ chu a No.2 a, kar thum chhung a zawnin hetiang hian chart-ah an awm zui a. Tichuan anni pahnih hi chart top two-a an awm dun vawi ngana a ni ta a ni.
Chart No.1 hlui bawk Drake ‘For All the Dogs’ chu 68,000 hralh lehin No.3-ah bawk a la awm a, Tate McRae album ‘Think Later’ chu 66,000 hralhin No.4-ah a debut a, he chart top 10-a a vawi khat lanna a ni. He album-ah hian a hla hit ‘Greedy’ kha awmin, Billboard Hot 100-ah No.7 te pawh a lo kai tawh a ni.
Chart top 10-a lang album dang zawng chu chart No.1 hlui vek an ni a, Michael Buble ‘Christmas’ chu 64,000 hralh lehin No.5-ah bawk a la awm a, Morgan Wallen ‘One Thing at a Time’ chu 63,000 hralh lehin No.4 atangin No.6-ah a tawlh a, Taylor Swift ‘Midnights’ chu 57,000 hralh lehin No.6 atangin No.7-ah a tawlh a, SZA ‘SOS’ chu 53,000 hralh lehin No.7 atangin No.8-ah a tawlh a, Taylor Swift ‘Lover’ chu 49,000 aia tam deuh hralh lehin No.11 atangin No.9 a kai thar leh a, Taylor Swift ‘Folklore’ chu 49,000 hralh lehin No.9 atangin No.10-ah a tawlh ve thung.
Nicki Minaj ‘Pink Friday 2’ album a No.1
