Niger leader paihthlak tak chuan US leh khawvel ram dangte chu sipai sorkarin an paihthlak hnuah ‘constitutional order tun din’ a nih leh theih nana pui turin ngenna a siam a.
Washington Post-a opinion piece a ziahah President Mohamed Bazoum chuan ‘hren a nihna’ atanga ziak a nih thu a ziak lang bawk a.
Paihthlak a nih hnuah west African state chu mumal lo takin a awm mek a. Ningani khan coup leaders te chuan France, US, Nigeria leh Togo atangin an ambassador te an koh haw tur thu an sawi nghal a.
Thuchhuah national television hmanga an siamah heng ambassador pali te hi ban nghal an nih thu an sawi zui nghal a ni.
He mi hma lawk hian US-a Niger ambassador Kirari Liman-Tinguiri chuan sipaite chu chhia leh tha hriatna hmang tura ngenin an hlawhtling thei dawn chuang lo tih an hre tur a ni tiin a sawi.
Niger hi uranium tam tham tak tharchhuaktu niin chu chu nuclear power atana pawimawh a ni a, hei bakah hian North Africa leh mediterranian-a migration route pawimawh tak a ni bawk.
Newspaper article a ziahah Bazoum chuan sorkar paihthlak chu vau lawkin, an hlawhtling a nih chuan ‘Niger ram mai ni lo, helai region leh khawvel pum tan nghawng chhia a nei ang’ tiin a sawi a.
“Kan shared values te, democratic pluralism leh rule of law zah te chu retheihna leh firfiakna beihlet nana kawng awm chhun tak tak a ni,” tiin Bazoum chuan a ziak bawk a.
“Niger mipuite chuan tun kan hun tawn khirh tak maia min thlawpna leh puihna hi kan theihnghilh ngai lovang,” tiin a ziak bawk.
Bazoum chuan coup leaders te chu Russian mercenary group Wagner te nena inzawmna nei an ni tia sawi bawkin, “Central Sahel region pum hi Wagner group hamngin Russian thuneihna hnuaiah a lut thei,” tiin Bazoum chuan a ziak bawk.
Hetih lai hian Niger-a sipaite thlawptu mi thahnem tak te chuan kawngzawhna neiin auhlaa pro-Russian slogans te neiin Russian flag te an sin bawk a.
Ningani khan Niger capital Niamey ah kawngzawhna lian tak neih niin mi sang tam tak an pungkhawm a, Niger laka West African ram tena financial leh trade sanction an kalpui an demna an aupui a ni.
Bazoum sorkar paihthlak a nihnaah hian Wagner te an inhnamhnawih em tih hriatfiah teih a ni rih lo va, mahse, Wagner leader te chuan Bazoum sorkar paihthlak a ni chu hnehna tiin an puang thung a ni. Sipai tena civilian sorkar an paihthlak hi EU, UN leh US te chuan an demna thu an sawi vek tawh bawk a.
A hma pawhin US Secretary of State Antony Blinken chuan phone hmanga Bazoum chu biain US chuan Niger-ah democratic hmanga sorkar thlan tun din ngei a duh thu a hrilh a.
Bazoum hi Niger a democratically elected president thlaktu hmasa ber niin kar kalta khan amah vengtu te ngei chuan che thei lova siamin Coup leader gen Abdourahmane Tchiani chu head of state a puan zui a ni.
Niger hi African region Sahel tia hriatlar zinga tel niin helai hmun hi jihadist te chetlak nasatna leh military regime nasatna hmun a ni a. Tun hnai lawkah pawh civilian sorkar chu Mali leh Burkin Faso ah te pawh din a ni bawk.
Islamist indurgent te beih kawnga sulstutu French leh US military base awmna a ni bawk a.
President Bazoum sorkar chu Mediterranean Sea kaltlanga migrants tena European ram an luh danna atana an thawhpui ber pakhat niin hei bakah hian human trafficking lam tihtawp a nih theih nana nasa taka hmalatu a ni bawk.
Niger leader in khawvel ram te sawm
