Nigeria-a Catholic sikul zirlai ruk bo tam tak chhuah

Thla hmasaa Nigeria lailia Catholic sikul atanga zirlai naupang ruk bo za chuang chu chhuah an ni tih thuneituten an sawi.
Niger state police chief Adamu Abdullahi Elleman leh sikul enkawltu, Bishop Bulus Dauwa Yohanna chuan sikul naupangte chhuah an nih thu hi an dawng ve ve tih BBC an hrilh.
President national security advisor pawhin a sawi tawh a; mahse, Bishop Yohanna chuan naupangte hi an chhungte nen an inhmu tawh em tih a la chiang lo tih a sawi.
Papiri-a St Mary’s Catholic sikul zirlai 250 chuang leh thawktu 12 hi thla hmasa khan ruk bo an ni.
Bishop Yohanna chuan chhuahte hi thuneituten a tul anga an dawna an chhungte hnena hlan a nih hmaa puih an ngaihnaah a puih a beisei tih a sawi a. Khawiah chiah nge an awm tih pawh a hre lo.
Zirlai chhuakte hi engtin nge an chhuah pawh a la chiang lo va, indawra chhuah nge tharuma chhuah nge tih leh tlanna peka chhuak tih pawh a la chiang lo.
An thenawm, Nasarawa state Governor Abdullahi Sule chuan chanchinbute hnenah sorkar laipuiin chhuah an nih theih nan hma a la nasa tih a sawi a, an hma lak dan tak erawh himna thil avanga sawi a rem loh thu a sawi.
Kar hmasa khan National Security Adviser Nuhu Ribadu chuan Papiri tlawhin Bishop Yohanna-a leh a thuihhruaite a kawm a, naupangte chu chhan chhuakin an chhungte nen an inhmu leh thuai dawn tih a hrilh.
Nigeria-ah hian ram laili leh hmar lamah sikul leh sakhaw biakna hmun beihna a tam thar hle.
November 21-a St Mary’s beih hma lawk, November 18-ah Kwara state-a Christ Apostolic Church beiin mi pahnih thah an ni a, mi 38 ruk bo an ni a. Hemi hma ni chiah hian Kebbi state-a Government Girls’ Secondary School beihnaah mi pahnih thiin Muslim zirlai 25 ruk bo an ni tawh bawk.
Kwara leh Kebbi state-a ruk bote hi chhuah vek an ni tawh thung.
Kar hmasa pawh khan hmun hnih atangin mi 20 vel ruk bo an ni a. Kogi state-a biak in sak tharah pastor, a nupui leh inkhawm thenkhat ruk an ni a. Hmar lama Sokoto state-ah Muslim eng emaw zat ruk bawk niin an zingah mo leh mo neitu pawh an tel.
Heng inruk bonaah hi tute nge a titu tih a chiang lo va, mi sual pawlten tlanna sum itin an che fo thin thung a. Hetih lai hian president thupuangtu chuan jihadist pawl tihah a puh thung.