Daily Newspaper

Nikhat thil thua Covid-19 kai tam ber tum thleng

12

World Health Organization (WHO) chuan Pathianni khan khawvel puma coronavirus inkaichhawn nasat ber a thlen thu sawiin darkar 24 chhungin Covid-19 kai thar 307,930 an awm thu a tarlang.

UN agency chuan nunna chan pawh 5,500 an awm thu sawiin tihian khawvel pumah Covid-19 avanga nunna chan 917,417 an awm tawh thu a sawi bawk.

Covid-19 kai thar hi India, US leh Brazil-ah an tam ber a ni.

Khawvel pumah Covid-19 kai maktaduai 28 an awm tawh a, heng zinga a zahve lawih hi America-a cheng te an ni a.

Nikhat thil thua inkaichhawn tam ber ni thin chu September ni 6 kha niin khami ni khan WHO chuan kaithar 306,857 an awm thu a sawi.

Khawi ramah te nge kaithar an tam nasat?
WHO chuan India chuan Pathianni khan kaithar 94,372 a neih thu leh kaithar 45,523 neitu US leh 43,718 neitu Brazil-in an dawt thu a sawi a.

Nunna chan zinga 1,000 vel ve ve hi US leh India ah niin Brazil-ah 874 darkar 24 chhungin nunna chan an awm thung.

India chu khawvela Covid-19 kai tam ber pahnihna ni tawhin US chauh a la pha lo va. August thla khan Covid-19 kaithar maktaduai hnih dawn niin pandemic thlen hnua thlakhata kaithar tam ber a ni zui bawk.

India ramah nikhatah Covid-19 kai 64,000 vel zel awmin chu chu July thla nena chhut chuan a sanna 84% lai a ni a, September thla tir phat atangin nunna chan nitin 1,000 an chuang ziah tawh bawk.

Brazil-ah nunna chan maktaduai li chuang awm tawhin khawvela pathumna an ni a. Latin America-a nunna chan tamna ber niin nunna chan 131,000 vel an awm tling tawh a ni.

US chu khawvela coronavirus kai hmun lia thena hmun khat vel awmna niin maktaduai ruk chuangin an kai tawh a. Mahse, tunah chuan a ni telin kaithar an tlahniam thung a. Covid-19 avanga nunna chan tamna ber chu US niin mi 194,000 chuang an awm tawh a ni.

Khawvel hmun dang dangah?
Europe ram te pawh virus len nawn leh hlauhna a lian hle a, virus kai thar an pung leh nasa hle.

Virus kai tam zualnaah chuan local lockdown kalpui thar leh niin mipuite chu hmaikawr leh social distancing rules zawm tura ngen nawn an ni bawk.

Peru, Israel, South Korea leh Australia-ah te chuan Covid-19 kai hi an pung zual leh ta a.

Pathianni khan Australian state Victoria-ah chuan stay-at-home order bawhchhia mi 70 chuang man an ni a. Melbourne khawpuiah lungawilohna lantir 250 vel an pungkhawm bawk a, heng mite hi pandemic chu conspiracy theory anga ngaitute an ni.

Victoria hi Australia a Covid-19 len nasatna ber niin an ram chhunga virus kai 70% leh nunna chan 90% chu Victoria state chhunga mite an ni.

Nimin khan New Zealand Prime Minister Jacinda Ardern chuan coronavirus restriction chu an khawpui lian ber Auckland tihlohah thlahdul a nih tawh tur thu a puang thung.

Israel erawhin Covid-19 kai an pun zel avangin ram pum huapa lockdown a kalpui thar thung a. Karkalta zirtawpni Jewish new year atangin khuakhirhna nasa tak kalpuiin kar thum chhung tal a kalpui rin a ni.

Israel-ah hian virus kai 153,000 chuang an awm tawh a, nunna chan 1,108 an awm tawh bawk niin John Hopkins University data chuan a tarlang.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy