Nikuma rubber cheng nuai 70
man hralhtute CM-in a tlawh
Mamit district Chungtlang khuaa rubber chingtute huan chu Zirtawpni khan chief minister Lalduhoma’n a tlawh a. An hmalakna enpuiin CM Rubber Mission hmanga hmalak zui zelna tur a en bawk.
Chief minister hian Tut lui thlengin Chungtlang rubber hmun a fang a, hmun remchang atangin W. Phaileng rubber hmun a thlir. Hemi hnu hian Darkhuang Zaua rubber huanah rubber chingtute nen an inkawm
Sawrkarin rubber a buaipui tan hun chu kum 1982 vel atangin a ni tih a sawi. Sawrkarna an chelh hma zawng khan scheme hrang hrang atanga chin tawh hectares 3025 vel a awm a, mimal chingtu an awm nual bawk, tiin, “Mizoramah hectares 50000 vela zauah rubber a chin theih niin kan hria a, CM Rubber Mission hmang hian kum 5 chhunga hectares 11500 a zaua chin khah kan tum dawn a ni,” a ti.
A sawngbawlna khawl thar 100 leina an pawmpui tawh a, kumina a hnai huna hman theih hman an tum tih chief minister hian a sawi a ni.
Soil & Water Conservation minister Lalthansanga chuan Chief Minister Rubber Mission hnuaiah nikuma pilot phase-ah kung 450000 an phun a. Kuminah nasa zawkin an bei leh dawn a, Mizoram cluster lian ber chu Chungtlang a ni a tih a sawi.
CM Rubber Mission phase 2-ah Chungtlang-a chhungkaw 105 chennaah hian hectares 95 an hmu a, phase-2 atanga a dawng tam ber pathumna niin, tunah hian lo an vat mek a ni. CM Rubber Mission phase-2 ah hian ram hectares 2575 a zauah rubber kung nuai 11 chuang phun tum a ni.
Chungtlangah hian kum 10 liamtaah khan rubber chin tan a ni a. Kung 75000 vel an phun a, an dam kim vek lo. Kum 2024 atangin kung 30000 vel an hnai tan a, khawl an indaih loh avangin an rubber zawng zawng hi an la hnai thei lo deuh tih sawi a ni. Kum 2025 chhung khan an khua hian rubber atangin cheng nuai 70 vel an lalut a ni.
Sawrkar chuan an rubber huan kawng hi tunhnaiah a siam thatsak a, concrete pavement-a siam zuina tur nuai 50 a pe bawk. Hmun hrang hrangah rubber chingtute tan khawl 100 lei turin hma lak a ni.
Nikuma rubber cheng nuai 70 man hralhtute CM-in a tlawh
