Mizoramah Myanmar a\anga raltlan mi sing chuang an awm a, mahse raltlan zat hi a tlahniam deuh reng. Kum tharah pawh nikum aiin an tlem. Mizoram Police-in an chhinchhiah danin, 2025 December ni 17-ah khan Myanmar atanga raltlan, Mizorama awm zat hi 26,122 a ni a, hei hi nikuma an chhinchhiah hnuhnun ber a ni. Kum tharah an chhiar leh a, January ni 7-a raltlan awm zat chu 25,590 a ni.
Police-te sawi danin, raltlante hi an che reng a, mahni khuaa kir leh an awm deuh reng. An khua a ralmuan deuhva kir leh an awm deuh reng a, chuvangin an tam lam pawh hi a che deuh reng.
Myanmar-ah hian February ni 1, 2021-ah sipaiin sorkar paihin thuneihna an pawng lak a, chumi hnu chuan mi engemaw zat an tlanchhia a ni. Ram hrang hrangah an tlanchhia a, Mizorama tlanchhia hi sing thum chuang an nih lai te pawh a awm.
Police te’n an chhinchhiah danin, tuna Mizorama awmte hi mipa 7629 leh hmeichhia 8070 an ni a, naupang 9891 an awm bawk.
Myanmar atanga raltlante tan hian district hrang hrangah relief camp siam a ni a, relief camp 76 awm mekin, chutah chuan mi 10,784 an awm. Hmun dangah mi 14,806 an awm bawk.
Raltlanah hian a tam ber chu Champhai district-ah an awm a, mi 13,098 an awm. An tlem berna Kolasib district-ah chuan mi 186 an awm.
Police-te chhinchhiah danin, October ni 1, 2025-a Mizorama Myanmar atanga raltlan awm zat chu 27,905 a ni am December ni 17, 2025-ah 26,122, January ni 7, 2026-ah 25,590 a ni.
Myanmar atanga raltlan zat
District Raltlan
Aizawl 4303
Champhai 13098
Hnahthial 540
Khawzawl 359
Kolasib 186
Lawngtlai 1141
Lunglei 1590
Mamit 279
Saitual 188
Serchhip 711
Siaha 3195
Total 25,590
Nikumah aiin kum tharah raltlan tlem
