October thla chawhnu lam a intan chauh a, vanduaithlak takin ruihhlo vangin mi 70 chuangin nunna an chan tawh. Nikum kum tluana ruihhlo vanga nunna chan aiin kumin thla kua leh a chanve vel chhunga nunna chan an tam tawh zawk.
Mizoram Excise & Narcotics (MEN) department chhinchhiah danin, kuminah October ni 16 thleng khan mi 73-in ruihhlo vangin nunna an chan tawh. Nikum kum tluana ruihhlo vanga nunna chan kha mi 67 an ni.
Kumina nunna chante hi mipa 61 leh hmeichhia 12 an ni a, 2024 chhunga nunna chante kha mipa 58 leh hmeichhia pakua an ni. Mipa pawh hmeichhia pawh, nikum kum tluana ruihhlo vanduaipuitu aiin kuminah an tam tawh ve ve. 2024-a ruihhlo vanga vanduaite hi kum 19 leh kum 52 inkar an ni a, kumina mite hi kum 19 leh kum 57 inkar an ni.
Kumina nunna chan mi 73-te zinga mi 27-te chu heroin vanga vanduai an ni a, mi dang 43-te chu heroin leh damdawi ruihhlo chi dang vanga vanduai niin, pakhat chu alprazolam vanga vanduai, pakhat chu eng ruihhlo ber nge hriat loh a ni.
An chhinchhiahna enin, tun hnai kum thum velah ruihhlo vanga chhiatna hi a tam a, 2022-a nunna chan zat mi 43 a nih laiin 2023-ah 76-ah a pung. 2024-ah mi 67 an ni a, kuminah thla 10 tling lovah mi 73 an ni.
MEN department hian 1984-ah ruihhlo vanga nunna chan zat hi an chhinchhiah a, 1984 atanga kumin October ni 16 thlengin mipa 1714 leh hmeichhia 238, an vaiin mi 1952-in ruihhlo vangin nunna an chan tawh.
Nikumah aiin kuminah ruihhlo vanga chhiatna thleng tam
