Site icon The Aizawl Post

Nikumah Champhai district ah nuai 3000 chuang hu ruihhlo man

Kum 2022 chhung khan Champhai district ah Police leh Excise & Narcotics chuan an thawhpui dangte nen ruihhlo cheng nuai
3812.80 hu an man.
District Level Narco Coordination Centre (NCORD) Committee Champhai thutkhawm vawi 5-na chu an chairperson, district bawrhsap James Lalrinchhana hoin Zirtawpni khan an thukhawm a. Champhai District Police leh Excise & Narcotics Department hmalakna kaltlanga nikum leh kumin chhunga ruihhlo man zat leh Narcotic Drugs & Psychotropic Substances Act 1985 hnuaia case ziahluh dan tlangpui report a ni.
Kum 2022 chhung khan Champhai Police-ten ND&PS Act 1985 hnuaiah case 89 an ziaklut a, hemi kaihhnaiwhah mi 118 man niin, heng zinga 29 hi ramdang mi an ni. Heroin hawng 2137 (gram 27800) an man a, tualchhunga an hralhna ang chuan a hlut zawng hi cheng nuai 641.10 hua chhut a ni. Methamphetamine mum 820400 (kg 85.11), a hlut zawng cheng nuai 1640.80 hu, Crystal Methamphetamine kg.20, cheng nuai 100 hu bakah Pseudoephedrine mum 180000 (kg 28.80), cheng nuai 126 hu an man bawk. Ruihhlo man zawng zawng hlut zawng hi nuai 2507.90 a ni.

Kum 2022 chhung khan Excise & Narcotics Department Champhai chuan ND&PS Act 1985 hnuaiah case 88 ziaklutin mi 108 an man a, heng zinga 19 hi ramdang mi an ni. Heroin kg 10.27, tualchhung rate-a cheng nuai 123.07 hu; Methamphetamine mum 393700 (kg 52.61), cheng nuai 1181.10 hu; Pseudoephedrine mum 8896 (kg 1.24), cheng 53,376 hu; Ganja kg 2.7, Rs. 6750 hu leh Alprazolam mum 1298 (gram 140.65), Rs. 12980 hu an man a. An man zawng zawng hlut zawng hi cheng nuai 1304.90 vel a ni.

Kumin bikah January 27 thlengin Champhai Police-in ND&PS Act 1985 hnuaiah case 6 an ziaklut a, hemi kaihhnawihah hian mi 10 manin an zinga 3 hi ramdang mi an ni. Heroin hawng 23 (gram 285.96) man niin, tualchhunga hralhnaa a hlut zawng Rs 690000 a ni a, hawng 7 mante hi Assam Rifles nena joint operation kaltlanga man a ni. Ganja kg 6.35, a hlut zawng Rs 9525 hu Assam Rifles nena man a ni bawk. Ruihhlo man zawng zawng hlut zawng hi Rs 6,99,525 a ni.

Kuminah Excise & Narcotics chuan ND&PS Act 1985 hnuaiah case 7 ziaklutin hemi kaihhnawiha man 11 zinga 2 chu ramdang mi an ni. Heroin hawng 74 (gram 895), tualchhung rate-a Rs 179000 hu an man a, heng zinga hawng 70 hi Assam Rifles nena man a ni.

Tutkhawmah hian ruihhlo avanga mante chak zawka ND&PS Act hnuaia hremna pek an nih theih nan hriatpuitu tha leh a chinchang hria tam zawk neih a tul tih sawi a ni a. Ruihhlo do kawngah pheikhai rual taka kal a, felhlel awm loa thil tisualtu dan hnuaia hrem an nih zel theih nana hmasawn ngaihna laite sawi ho a ni.

Exit mobile version