Mizoram State lottery chuan nikum chhung khan cheng vaibelchhe 20 a hmuchhuak a, online lottery an la kalpui loh avangin distributor duh zat hmuh theih a la ni lo.
Mizoram Institutional Finance & State Lottery kalpui mek dan leh tihhmasawn zel dan tur ngaihtuahin Ningani khan finance changtu chief minister Lalduhoma hoin an thukhawm a. State lottery kalpui mek dan report niin, nikum chhung khan cheng vaibelchhe 20 a hmuchhuak.
A draw-na tur khawl (mechanical draw machine) an nei a, draw apiangin judge pahnih leh supervising officer-ten en endik a, online-in a video hi live-a tihchhuah thin a ni. Online-a en theihna link hi ticket hnungah leh state lottery website-a tarchhuah zel a ni a; ticket hralh loh (unsold ticket) hi draw hmain distributor-ten an kir (return) vek thin. Result hi website-a an tlangzarh bakah distributor-te an pe vek a. Ticket print-na hmun hi Reserve Bank of India leh Indian Banks’ Association phalna pek printing press-ah chauh kalpui a ni.
State Lottery Regulation Rules 2019 angin an kal a, mamawh zat distributor an awm thei rih lo thung. Tunhnaiah tender chhuah thin mah se, online lottery an la kalpui loh avangin chhangtu dang an awm belh rih lo nia ngaih a ni. Paper lottery leh online lottery kalpui dun theih tumin inbuatsaihna kalpui mek a ni, tih te sawi a ni.
Thutkhawmah hian adviser to CM (Finance) TBC Lalvenchhunga, commissioner & secretary to CM Vanlaldina Fanai leh Finance department hotute, Institutional Finance & State Lottery hotute an tel a ni.
Nikumah state lottery-in vbch.20 hmu
