Nin chang ni awm mah se

Mihring nunah chauh chang ni a awm thin a, tu tan pawh, eng ti mite tan pawh chauh chang ni a awm ang. Chau chung chunga kal a ngaih chang a awm a, ning chung chunga tan tlat a ngaih chang a awm.
Mi hlawhtlingte pawh hian chauh chang an lo nei a, ning chung chunga an beih a ngai thin. Mahni tuina lama kalte hlei hlei hi an hah emaw tih tur a ni. Mizo footballer lar Apuia Ralte pawh hian ning chung chunga a beih chang a awm a, chauh chang te pawh a nei.
Profesional footballer ni chungin Apuia hian lehkha a la zir a, MA (Sociology) a zir mek. A hnaah zirna lama certificate a mamawh lo a, chuti chunga zir chu a ni. A ning ve thin a, ning chung chunga a zir a ngai.
“Lehkhazir hi, ni e, a ninawm chang a awm. Football te ngei ngei pawh kan nin chang a awm a, kan nuam tih em em, kan eizawnna ngei pawh kan ning a, chuvangin lehkhazir te chu nin chang kan nei ang tih a chiang a,” a ti.
Naupan lai atanga lehkhazir nuam ti mi a nih loh thu a sawi a, a nu leh pa thu awiha tun thlenga lehkha hi zir a ni.
“Lehkhazir hi nin chang ka nei a, peih loh deuh chang ka nei a. Dik tak chuan kan kalna lamah lehkhazir hi chutiangin kan mamawh lo a, chuti chung chuan ka zir a, ning chung chung pawhin ka zir thin,” a ti a, “Ka nu hian zirna hi a ngaisang em em mai a, a sang thei ang ber zir turin min duh a, kan la ti ve zel a nih hi,” a ti bawk.
A tuina lamah a kal a, mahni tuina lama kal tia lo awt pawh an awm ang. Mahse mahni tuina lama kal mi dangte ang bawkin Apuia hian football lamah pawh chauh chang a nei a, tih hram hram chang a nei.
“Football pawh, kan nuam tih em em pawh nin chang kan nei a, chauh chang kan nei a. Peih lo chung chunga kan tih a ngaih chang a awm. Training te hi peihawm loh riau chang a awm a,” a ti.
“Chauh chang te, nin chang te hi chu, thil awm turah ka ngai a, eng thilah pawh a ken tel turah ka ngai mai,” a ti a, “Kristiannaah pawh chauh chang a awm a, thil hi tih hram hram a ngai,” a ti bawk.
“A tawp thleng rata kal hi tum tlat ila, tiang chuan ning chung chung pawhin bei ila, chu chu kan tih tur ni berin ka hria,” Apuia chuan a ti.