National Institute of Technology Mizoram 8th Convocation chu Thawhlehni khan neih a ni a, hmanpuitu chief minister Lalduhoma chuan Lengpuia an campus-ah hna an chhunzawm thei tep tawh tih a sawi.
NIT chu India rama zirna in tha bik kan neih zing ami a ni a, he zirna ina zir phak nih pawh a hlu hle tih chief minister hian a sawi a. NIT Mizoram atanga hlawhtlinna chang thar zirlai 147 bakah an nu leh pate a lawmpui tih sawiin, “India ramin engineer tam tak kan neih belh a. A tir atanga vawiin thlenga zirlai naupang tha tak tak chher chhuaktu NIT Mizorama thawktute chungah pawh kan lawm a ni,” a ti.
Khawvelin resource a neih ropui ber chu human resource a ni, tiin, human resource chu hman tlak taka kan buatsaih chuan matheiloin ramin hma a sawn thin tih a sawi. “Human resource kan buatsaihna hmun ber chu kan zirna in te an ni. NIT Mizoram pawh hian engineer tha chher chhuah kawngah mawhphurhna pawimawh tak a chelh a. Mizoram leh India ram tana engineer tha chher chhuaktu ni turin kan duh. Chuvangin, thawktute pawh a tling leh tlak (qualify) ngei zel nise, politic boruak tha lo engmah inrawlh lo se kan duh a. In thiltih tinrengah hei hi min lo hriatsak reng dawn nia,” a ti.
A kaihhruai sawrkarin NIT Mizoram pawimawh zia a hria a, Lengpuia campus sak meka harsatna tawh, forest clearance pawh rang takin an umzui a. Sawrkar laipuiah ziakin an thlen a, hmaichhanah an sawipui bawk tih chief minister hian a sawi. An dilna ngaithlain tunhnai khan Forest Advisory Committee an lokal a, Penal CA leh penal NPV chawi tur cheng vaibelchhe 22.45 chu vbch. 3.8 ah an tihhniam sak a. Board of Governor lamah hei hi an thawn a, an rawn chinfel thuai beisei a ni tiha sawi. “Hei hi kan chinfel chuan a sak chhunzawm hna hi rang takin kan thawk zui ang,” a ti.
Chief minister hian gold medal dawngte hnenah certificate leh medal a hlan a. Under graduate branch panga zinga civil engineering branch-a gold medal dawngtu hi Remruatfela a ni.
Board of Governor chairman Harshavardhan Neotia sawi danin NIT Mizoram chu India rama 5G case laboratory hmang thei tlemte zing ami a ni a. IIT Madras leh IIM Visakhapatnam nen inremna siamin zirlai pass chhuakten IIT Madras-ah direct-in Ph.D an tizui thei a, heta final year an zir lai atangin IIM Visakhapatnam-ah MBA zir zawm turin an inziaklut thei bawk. NIRF ranking-ah 101-150 huangah an awm mek a. Reiloteah hei aia sang zawkah hian an chho ngei dawn tih a sawi a ni.
8 Tun Convocation-ah hian 2020 batch B.Tech degree, 2022 batch M.Tech degree leh Ph.D degree te hlan a ni.
8 B.Tech branch-ah hian civil engineer degree 28, computer science & engineering degree 25, electronics & communication engineering degree 25, electrical & electronics engineering degree 20 leh mechanical engineering degree 18 pek an ni.
8 M.Tech degree hi mi 3 hnenah hlan niin, Ph.D degree hi branch 7 atangin mi 28 pek an ni. Tun tuma degree hmu tharte hi an vaiin 147 an ni.
8 NIT Mizoramah hian under graduate course chi 5, post graduate course chi 4 leh Ph.D degree course a awm mek.
8 NIT Mizoram hi kum 2009-a sawrkar laipuiin NIT sawm a din thar zing ami niin, July 2010 khan NIT Nagpur campus uapna hnuaiah zirna bul tan a ni.
8 Campus tur hi Lengpuiah sak niin, engemawchen hna thawh tawh a ni a. Forest clearance lamah chinfel ngai a awm avangin hna chawlh rih a ni.
8 Tunah hian Chaltlangah building 11 luahin zirna an kalpui mek a. Zirlaite awmna tur hostel building 6 dang an luah hawh tel bawk.
NIT Mizoram Convocation hmang Campus sak zawm thei tep – CM
