Daily Newspaper

NIT Mizoram zuihral loh nan hma la turin CM ngen

76

National Institute of Technology (NIT) Mizoram chu a zuihral mai loha hma a sawn theih nan hma la turin Science Teachers Association Mizoram (STAM) chuan chief minister an ngen.

STAM hruaitute hian chief minister Zoramthanga hmu in NIT Mizoram chungchang hi an sawipui a. NIT hi India Parliament-in ‘Institute of National Importance’ a a dah a nih avangin India ram pumah 31 chauh a awm a. Mizoram pawna engineering college pangngaia admission changlo Mizo thalai tam tak an awm laiin, engineering college satliah ni lo, NIT Mizoram hi Mizo thalaiten luhna tlakah an ngailo nia a lan thu hrilhin, a thanat thlak hlea an hriat thu an sawi. Hetiang zela a kal chhoh chuan NIT Mizoram hi a zuihral mai an hlau tih STAM hian an sawi a ni.

Chief minister hnena an thu thlen zingah, Lengpuia NIT campus landlease chu Mizoram Higher & Technical Education secretary hminga siam a ni a, land lease hi NIT Mizoram hminga thlak a nih phawt loh chuan central atangin grant tam ber sanction theih a ni lo, an ti. Hei hi CM hian tihfel thuai a tum thu a lo hrilh.

Lengpuia NIT campus chhungah hian Riverine Forest Reserve-a puan engemawzat a awm avangin ram – thing leh mau leh adt. tihchhiat man atan penalty cheng vaibelchhe 1.88 dawn chawi a ngai a, Riverine Forest Reserve chungchang hi Lengpuia NIT campus mai niloin Mizoram hmun hrang hrang nen a inkungkaih a, mipui tana harsatna thlen mektu a nih avangin Mizoram sawrkar pawhin nasa taka a buaipui lai a nih thu CM hian a lo hrilh a. Riverine Forest Reserve area khawih chungchanga National Green Tribunal a lo thlen thin tute pawh lo insum turin an duh hle tih STAM hian an sawi.

Kum 2010-a bul tan NIT Mizoram hi Lengpuia an permanent campus tur chu 2012 October 13 khan khatih laia HRD minister Kapil Sibal-a’n a lungphum a phum tawh a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy