Daily Newspaper

NIT thuanawp rei hi…

12

Kum 2010-a Mizorama din tawh, national institute pawimawh tak “National Institute of Technology” (NIT) chungchangah nimin khan Science Teachers Association Mizoram (STAM) chuan chief minister an hmu a. Tun thlenga a nihna tur anga NIT, Mizoram kalpui theih a la ni lo chu a zuihral mai an hlauhthawn thu chief minister hi hrilhin, NIT Campus Land Lease, Secretary, Higher & Technical Education hminga awm mek chu Central lamin Grant an sanction theih loh chhan a nih thu te leh, NIT campus-in Riverine Forest Reserve a huam tel avanga National Green Tribunal nena buaina awm mek thu te an thlen a, harsatna sukiang tura hma la turin an ngen a ni.

Hetih lai hian, kum 2010-a Mizoram-in NIT a neih ruala nei ve dang state 11 te chuan NIT hi changtlung takin an kalpui thei vek tawh a. Northeast bikah chuan Mizoram ruala NIT dinna state te chu Arunachal, Nagaland, Manipur, Meghalaya leh Sikkim te an ni. Heng NE state dangte hi chuan ranking te pawh an nei pha tawh a. India ram pumah NIT hi 31 awm mek in, kum 2001 atang khan NIT hi kalpui tan a lo ni tawh a ni.

Mizoramin NIT kan nei ve dawn tih thawm hriat a han nih khan mipui leh ram hruaitute pawh an phur hle a. A tirah chuan NIT hmun tur kha Thenzawl-ah en a ni a, khawtlang pawhin ram zautha tak an pe a. Mahse, NIT dinna tura thil tul (criteria) thenkhatah Thenzawl hmun chu a tlin tak loh avangin Airport hnaihna Lengpui ram chu tihfel a ni leh ta zawk a. Khatih lai boruakah pawh khan, NIT hmun tur sawn avanga lungawilohna lantir nana road block huaihawt te pawh an awm hman a nih kha.

NIT Mizoram dinna turah hian neuh neuh a awm rei ta hle a. Kum 10 zet a vei tawh hnuah pawh, kan neih ruala nei state dang ten changtlung taka an kalpui mup mup tawh laiin, chaurau ek kan la thai deuh chu a ni ber a. Nikum thleng khan, Mizoram Assembly Session-ah khel a la hlawh leih leih a. Hemi chungchanga harsatna awm chhan pakhat, NIT-Mizoram Director-in a sawi dan chuan NIT Mizoramin permanent campus a nei lo chu an harsatna lian ber a nih thu a la sawi a nih kha.

Thenzawla NIT din tumna hmunah khan, NIT hnu feah Golf Course changtlung zet chu din fel a ni vek tawh a. He Golf Course hi khualzinte hipna tura ruahman, tourism promote-na chikhat a ni awm e.

Thiamna lama thalaite chher hriamna tura Ministry of Human Resource Development-in institution tha tak kan state chhung ngeia min rawn hunsak erawh, kum 10 a vei tawh hnuah pawh Land Lease, Riverine Forest Reserve tih velah kan la buai leih leih chauh mai hi chu, puhmawh tur dang an awmin a lang lo. Ram hruaitute hian thalaite dinhmun hi an vei takzet a nih chuan, hmun dang pan buai ngai lova kan ram leilung chhung ngeia awm NIT puitlinna turah kum 10 chhung hi chuan a tifel ve tawh tura ngaih a ni. STAM-in an sawi ang hian, hetiang renga kan kal chuan, NIT hi a zuihral mai hlauhthawnawmin a awm chu a ni ber tawh awm e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy